Kăn xiâm pơkuâ hnê ngăn Đảng tối nhên, Việt Nam ngăn nhoăm tơrŭm cheăng  tiah hmâ ing nah lĕm ƀă Rusi, tung mê tơrŭm hnê mơngế vâ bro kăn ƀô̆ cho mâu ki kal, veăng mơdêk ki tơƀrê ‘na mơngế pêi cheăng vâ pơxúa tung mơjiâng ƀă kring vế tơnêi têa tung tơdroăng nôkố.

Kăn xiâm pơkuâ hnê ngăn khĕn kơdeăn mâu tơdroăng tơrŭm cheăng pơla Học viện Chính trị Quốc gia Hồ Chí Minh ƀă Học viện Hành chính, ƀă hnoăng pơkuâ ngăn dêi Kăn xiâm pơkuâ kong têa Rusi tung mâu hơnăm hdrối; loi khât hneăng lăm pôu ƀă pêi cheăng dêi khu kăn kô veăng mơdêk tâ nếo tơrŭm cheăng pơla péa Học viện ƀă mâu kơ koan khu râ pơkuâ cheăng dêi péa tơnêi têa.

Pakĭng mê, po hên troăng tơngah ki nếo tung hnê hriâm vâ bro kăn, ăm mâu kăn ƀô̆ hriâm tơ’nôm, tăng ‘nâi plĕng ‘na khoa hok ƀă tơrŭm hên tơdroăng. Tối mơnhên, Đảng ƀă Tơnêi têa Việt Nam đi đo pro hlâu vâ po rơdâ tơrŭm cheăng pơla mâu hngêi trung hnê hriâm, tăng ‘nâi plĕng tung mâu tơdroăng cheăng xúa kơmăi ki dâi lĕm, pơ’lêh hriăn plĕng ki nếo, pơ’lêh kơxô̆ ƀă mâu kơvâ cheăng ki nếo ki ê, pôa Tô Lâm - Kăn xiâm pơkuâ hnê ngăn Đảng pơkâ thế péa học viện pơtối rak vế ki châ tơƀrê; po rơdâ mâu tơdroăng tơrŭm hriâm ‘na rak ngăn tơdroăng cheăng tơnêi têa, tơdroăng kal kí, ‘mâi hơ’lêh cheăng, rak ngăn troăng hơlâ, pơ’lêh kơxô̆ tung tơdroăng cheăng ƀă ivá pơkuâ a râ kân tâ.

Pakĭng mê, mơhnhôk mơdêk tơpui ƀă thái cô hnê, tăng ‘nâi plĕng sinh, mâu ki hriâm; tơkŭm mâu hneăng hriâm khoa hok vâ tối ăm ‘nâi túa mơjiâng Tơnêi têa tro tiô troăng rak ngăn eăng mâ ƀă rak ngăn tro tiô mơnhông tơnêi têa.