Kơxê lơ 27/8 a Hà Nội, tơkŭm po leh tơbâ 80 hơnăm hâi mơjiâng Khu xiâm pơkuâ kăn ƀô̆ ƀă Hneăng hôp tơ’noăng pâ nhuô̆m tơnêi têa roh má I, vâ vêh tơbâ troăng prôk ƀlêi trâng ƀă pâ mơnê mâu rơxông kăn pơkuâ, kŏng chưk, viên chưk,.. kơvâ pơkuâ kăn ƀô̆ vâ loi tơngah krá tơniăn mot chal nếo ƀă pói vâ pleăng ăm xua môi Việt Nam rơdêi ‘nâng.

Teăng mâ mâu kăn pơkuâ Đảng, Tơnêi têa nhuô̆m diâp Mê dái pêi cheăng ối má môi ăm Khu xiâm pơkuâ kăn ƀô̆, Pôa Tô Lâm, Kăn xiâm pơkuâ hnê ngăn Đảng mơnhên, mơhé ối a hneăng ki lâi, rơxông tơplâ lơ rơxông hơniâp lĕm, mơjiâng lơ pơhlêh nếo – kơvâ pơkuâ kăn ƀô̆ đi đo cho khu ki môi hiâm mơno, pêi tâi ivá, tơmiât pêi rơkê, kum tơdrêng mơjiâng tơdroăng pơkuâ tơnêi têa ƀă rak ngăn tơdroăng rêh ối pơlê pơla.

Kăn xiâm pơkuâ hnê ngăn Đảng pơkâ kơvâ pơkuâ kăn ƀô̆ pơtối mơnhông hnoăng tíu xiâm tung tơbleăng ƀă pêi pro troăng hơlâ kum rêh ối pơlê pơla tơniăn tâi tâng, tŭm tâi, châ tơƀrê; pơhlêh nếo trâu hơngế tơdroăng tơ’noăng – kheăn kơdeăn vâ păng ‘nâng mơjiâng mâu tơdroăng tơ’noăng trâu hơngế, ai ivá pro tơtro kân, mơnhông tơdroăng pói vâ pleăng hnoăng cheăng tung chal mơnhông mơdêk nếo; ki rơhêng vâ tối, djâ troăng ahdrối tung pơhlêh xúa kŏng ngê̆, pơhlêh pro mơ-éa, chiâng um méa ki kal tung khu cheăng.