Kơxo lơ 13/4, a pơlê kong kơdrâm Nha Trang, kong pơlê Khánh Hòa, pôa Trần Hồng Hà, Ngế pro xiâm phŏ hnê ngăn Chin phuh veăng Hneăng hôp lâp tơnêi têa Khu chêh hlá tơbeăng Việt Nam. Xông tơpui a Hneăng hôp, pôa Trần Hồng Hà, Ngế pro xiâm phŏ hnê ngăn tơnêi têa mơnhên, tung pơla kố nah, hlá tơbeăng kăch măng Việt Nam hiăng chêh tối ôh tá tơdjâk pakong, tŭm tơdroăng rêh ối pơlê pơla, tơdroăng tơmiât, pói vâ dêi kuăn pơlê.

Hlá tơbeăng pêi lĕm tro hnoăng djâ troăng ahdrối tung tơdroăng troăng tơmiât – tơdroăng kal – tơdroăng pơtâng, djâ troăng ahdrối tung tơdroăng troh lâp lu tơdroăng kal ki tro khât, um méa dêi Việt Nam ‘’rak tơniăn, tơniăn lĕm, hơniâp lĕm, rŭm nhŏng o, mơnhông mơdêk’’.

Pôa Trần Hồng Hà pơkâ thế mâu khu râ kal mơnhên troăng prôk mâu kơ koan chêh hlá tơbeăng chêh tơtro, chêh trâu hơngế, tâi tâng tơdroăng rêh ối vâ ai hên ƀai chêh ki dâi lĕm, mơdêk tơdroăng ki tơplâ mơdât, ki kơnâ trâu hơhngế.

Mâu kơ koan chêh hlá tơbeăng pơtối mơjiâng khu chêh hlá tơbeăng rơkê, kô chiâng ngăn cho mâu ngế rơkê ‘na cheăng kâ, tơpui kâ ƀă kong têa ê, ngê̆ thuât, kŏng ngê̆.