Tung rôh po hneăng hôp Kuô̆k hô̆i tơrŭm cheăng tơpui nâl Pơhlăng ‘na pêi chiâk pêi deăng krá ton, gâk kring bê tŭm kế kâ ƀă hbrâ ví kong prâi pro pơhlêh ƀă Rôh hôp Khu pơkuâ Tơrŭm cheăng Kuô̆k hô̆i tơpui nâl Pơhlăng (APF), kơxê lơ 22/1, a pơlê kong kân Cần Thơ, pôa Trần Thanh Mẫn, Kăn xiâm hnê ngăn Kuô̆k hô̆i hiăng tơdah Kăn xiâm phŏ hnê ngăn Kuô̆k hô̆i râ má môi Kul cho poa Ouch Borithp.

Pôa Trần Thanh Mẫn, Kăn xiâm hnê ngăn Kuô̆k hô̆i tối nhên, Việt Nam đi đo ngăn nhuô̆m, kơjo gum apoăng ăm tơdroăng ki ôh tá la lâi pơtê ‘mâi mơnhông ƀă mơdêk tơrŭm cheăng kong têa ki a chê tơniăn lĕm, tơrŭm tơroâ khôi hmâ, tơrŭm tŭm têk, krá ton pơla péa tơnêi têa; đi đo môi tuăn khât ƀă Đảng Nhân dân Kul CPP ƀă tơnêi têa Kul; môi tuăn môi tơnêi têa Kul tơniăn krê, hơniâp lĕm, mơnhông kro mơdrŏng ƀă mơdêk hnoăng cheăng, tíu ối a kong têa ê.

Péa ngế kăn xiâm pơkuâ phiu ro drêng hlo tơrŭm cheăng péa tơnêi têa tung pơla hdrối nah pơtối châ ‘mâi mơnhông, thăm mơdêk. Péa tơnêi têa rak vế pơtroh khu râ kăn troh a tơnêi têa dêi rơpó; tơdrêng amê hlối thăm mơdêk tâ nếo tơrŭm cheăng pơla péa tơnêi têa ƀă Lếo tung la ngiâ vâ pái to kong têa Đông Dương rơtế mơnhông tơniăn, krá ton veăng gum ăm hơniâp lĕm, kro mơdrŏng dêi kơpong.