A rôh trâm mâ Kăn xiâm hnê ngăn kuô̆k hô̆i Kul, jâ Khuôn Sudary, péa ngế kăn vâ môi tuăn tung la ngiâ péa pâ kal pơtối ‘mâi mơnhông tuăn loi kal kí đi đo tơpui tơno lăm pôu dêi rơpó, trâm mâ mâu râ kăn tâi tâng mâu ƀâng ki pêi cheăng; pơtối trâm mâ pơla mâu kăn Kuô̆k hô̆i péa tơnêi têa vâ tơpui tối ăm dêi rơpó ‘na túa pêi cheăng tung tơdroăng ‘na luât, séa ngăn ƀă pơkâ mâu tơdroăng ki kal dêi tơnêi têa.

A rôh trâm kăn xiâm hnê ngăn kuô̆k hô̆i Timor Leste, jâ Maria Fernanda Lay, pôa Trần Thanh Mẫn - Kăn xiâm hnê ngăn Kuô̆k hô̆i pơkâ thế, péa pâ rĕng tơkŭm po hôp apoăng dêi luât Vi ƀan tơrŭm cheăng ‘na cheăng kâ - Kih thuât Việt Nam- Timor-Leste  vâ tơpui ‘na mâu tơdroăng ki nhên tung tơdroăng ti tăng pêi tơƀrê tơmeăm khoăng ai hlâu ing tơdroăng hiăng kĭ tơhrâ; tơbleăng pêi pơxúa mâu tơhrâ hiăng kĭ xuân môi tiah rĕng pê klêi tâi tâng, mơ-eăm kĭ mâu tơdroăng pơla péa pâ tung kơvâ hnê hriâm - hnê mơjiâng tuăn ngôa rơkê, tê mơdró, kăn teăng mâ, khoa hok hok - kơmăi kơmok, ôm hyô, on tơhrik krúa.