Mâu kăn teăng mâ mơnhên mơ-éa chêh hdrối Khu luât Xôi kân (‘mâi rơnêu) cho rơhí rơhó, inhên ƀă troăng tơmiât mơjiâng luât tiô rơxông nếo, tơniăn tơdroăng ki tơdâng pơla kơtăng pơxâu phâk ƀă mâu ngế xôi ki rơ-iô nếo ƀă tơdroăng po rơdâ pơklêi lôi, ai hiâm mơno lĕm dêi Tơnêi têa. Pơtối mê, ngế ki xôi hbrâ chêl thiê̆n, rơnêu tơdroăng ki tro lup tơxâng châ séa ngăn kơlo pơklêi lôi tơdroăng xôi hên tâ vâ mơhnhôk ai hiâm mơno pôu râng hnoăng cheăng.

Tơdjâk troh pơkâ ‘na pơxâu phâk kơtê, mâu kăn teăng mâ môi tuăn tah lôi tơdroăng pơxâu phâk kơdê a 4 tơdroăng xôi pro ôh tá tơniăn gâk kring tơnêi têa cho tơdroăng mơngế xôi pro tơxul tơxal, ngế xôi Tơtrâ khu kuăn mơngế, ngế xôi tơplâ ƀă ngế xôi pro tơtrâ tơnêi têa vâ tơtrâ khu râ kăn pơkuâ kuăn pơlê.

Mâu kăn teăng mâ pơkâ thế pôi tá tah lôi tơdroăng pơxâu phâk kơdê ƀă mơngế xôi tê mơdró matŭi ki hên ƀă ai ngế ki pơkuâ djâ. Mâu rơkong tơpui a rôh hôp xuân môi tuăn tơdroăng pêi pro, ing hbrâ, tơkŭm po troh pêi pro, xua mơdât ing tơdroăng hbrâ kô mơdât châ tơdroăng tro tơ’nhê dêi kuăn pơlê ahdrối drêng liăn păng ‘nâng châ pơtroh prôk tíu ê.