Kơxo hâi lơ 2/7 a tíu xiâm pêi cheăng dêi cheăm Tân Hà, Lâm Hà, kong pơlê Lâm Đồng, chât ngế ối ‘nân tơkôm vâ pro hlá mơ-éa  ki kố ki mê, ki hên hla mơ-éa tơdjak troh tơnêi.  Pôa Phạm Duy Lâm, ối a thôn Đức Bình troh akố tối nếo ‘nâi ôh tá ai tơring xếo, tơdroăng pro hlá mơ-éa pơ’lêh xúa tơnêi kô xúa cheăm pro ăm. Châ Kăn ƀô̆ cheăm hnê nhên, pôa lâm phiu ro ƀă loi khât tơdroăng pro hlá mơ-éa kô rĕng klêi.

“Hâi kố lăm pro hlá mơ-éa hlo kăn ƀô̆ hnê kơhnâ hnê tối túa pro, ki klâi hâi teăm pro mê vâi kô tơhrâ thế pin lăm troh. Tiah mê ngăn hiăng hôp, xuân tối tơngah châ pro hlá mơ-éa rĕng tơ’lêi‘’.

Xuân pro hlá mơ-éa tơdjâk troh tơnêi, jâ Hoàng Thị Thanh Nhàn, ối a ƀon B’Srê B, cheăm Tà Đùng, kong pơlê Lâm Đồng tối tro kơ tuăn tơdroăng pơ’lêh nếo mê, ngăn rơkê ƀă mâu kăn cheăm ki nếo tơpui lĕm tro ƀă kuăn pơlê.  Jâ Nhàn púi vâ kuăn pơlê troh lăm pro hlá mơ-éa kô châ tối mâu kăn pêi cheăng tro tơƀrê ‘na tơdroăng  pêi cheăng pro hlá mơ-éa ƀă kơxô̆.

“Kal thế rĕng tơbleăng, vâ kuăn pơlê ai mâu tơdroăng tiâ, tro lơ ôh tá tro, 5 hơlŏng cho tiâ tro hôm, 4 hơlŏng cho tiâ tối tro iâ tâ pơtih ga ti mê. Tơdroăng châm điêm xuân ngăn a to ngế ki châm mê vâ châm ti lâi hên lơ iâ la tâng mâu kăn ƀô̆ tơdah pêi cheăng tơpui lĕm rĕng kuăn pơlê kô châm tối lĕm tê”.

Kơ’nâi 1 măng tĭng pêi cheăng tơ’mot tơdjuôm, mâu kăn cheăm a Lâm Đồng hiăng pêi cheăng, rôh apoăng xuân ăm hlo ối hên ki xơpá ‘na hngêi pêi cheăng tơmeăm khoăng, kơmăi vâ pêi, malối mâu Tíu pêi cheăng xiâm tơnêi têa. Vâ tơkâ luâ kơ xơpá, mâu kăn cheăm bêng ‘nâi nhên hnoăng tơná pêi cheăng tâi tơdroăng cheăng pêi tâi chôu, ‘na kuăn pơlê kô ối pêi cheăng ‘nôi. Pôa Nguyễn Minh Toàn, Phŏ Kăn hnê ngăn Vi bban kuăn pơlê hlối pro Ngế pơkuâ Tíu xiâm pêi cheăng tơnêi têa a cheăm Tân Hà, Lâm Hà, kong pơlê Lâm Đồng ăm ‘nâi, tung to lâi hâi apoăng, cheăm tơdah pro hlá mơ-éa ƀă hnê vâ chê 169 ngế pro hồ sơ. Ai hên tơdroăng cheăng pêi cho ki mâu kăn râ tơring ton nah. La ƀă tơdroăng hbâ rơnáu nhên hdrối ƀă hlối  pơ’lêh nếo xuân pêi cheăng tro tiô hiăng hnê, râ cheăm ki nếo vâ tối hiăng pêi tro tiô kal vâ tơdroăng cheăng dêi kuăn pơlê. Pôa Nguyễn Minh Toàn, tối:

“Ngin tăng mơnhên ngăn hdrối, tơdroăng cheăng cheăm ki nếo hngăm hngo, nôkố vâ tối 100% tơdroăng cheăng pêi dêi tơring nah hiăng pơcháu ăm cheăm pêi pơtâi, mê ngin hiăng hbrâ rơnáu hdrối ki hâi apoăng, rah pơcháu ăm tơrêm ngế kăn ƀô̆  pêi cheăng pêi lê̆m tro tơpui rơtal rĕng tơmâng kuăn pơlê. Ƀă tơdroăng cheăng pêi pơxúa ăm kuăn pơlê mê ngin kô djâ ăm tơdroăng cheăng pêi lĕm má môi, mâu hlá mơ-éa pro kô tơ’lêi rĕng’’.

‘Nâi nhên tơdroăng pêi cheăng nếo cho pêi cheăng ăm kuăn pơlê, a hên cheăm, bêng dêi kong pơlê Lâm Đồng hiăng ƀă dế pơ’lêh  nếo tơdroăng pêi cheăng, Pơ’leh hên ing pêi pro tro kơ tuăn chiâng tro kơ tuăn. Hên hlá mơ-éa hiăng châ tơbleăng pro liên thông ôh tá tiô tơnêi tíu. Tơdrêng môi túa hlá mơ-éa, kuăn pơlê, khu mơdró kô chiâng rah xêh vâ pro a cheăm, bêng kố lơ a cheăm, bêng ki tá mê mâu kăn a hên cheăm, bêng hiăng chô hbrâ tăng troh kuăn pơlê, khu mơdró ƀă ngăn vâi môi tiah tơmối vâ pro pêi cheăng ăm.

Tiô pôa Trần Nam Thuần, Kăn hnê ngăn Vi ƀan cheăm Tà Đùng, kong pơlê Lâm Đồng, tâng tơdroăng pêi cheăng ôh tá lĕm tro kô pro hên kuăn pơlê kô lăm pro hlá mơ-éa a cheăm ki ê mê khu kăn pêi cheăng dêi cheăm mê kô tro tối pêi cheăng hâi lĕm tro. Xua mê, mâu kăn cheăm dế hnê mâu kăn ki nếo pêi cheăng tro tiô troăng hơlâ pêi, hiăng ngăn kuăn pơlê, khu mơdró cho tơmối ki pin vâ pêi cheăng ƀă.

“Pơ’lêh kân má môi dêi mâu kăn kong pơlê 2 râ cho tơkŭm vâ pêi cheăng ăm kuê̆n pơlê ƀă khu mơdró. Pơxiâm ing mê mâu hâi apoăng, Vi ƀan kuăn pơlê cheăm Tà Đùng hiăng hôp, hnê tâi tâng ăm mâu kăn ƀô̆, mâu kăn vâ pơ’lêh tuăn tơmiêt, túa pêi cheăng. Ing tơdroăng mê, vâ hnê ăm kuê̆n pơlê ‘nâi mâu tơdroăng pro hlá mơ-éa, mê cho tơdroăng ki vâ toi kuăn pơlê tung tơdroăng pro hlá mơ-éa ki kal”.

Klêi môi măng tĭng pêi cheăng túa kăn xiâm kong pơlê 2 râ ki nếo a Lâm Đồng dế ăm hlo mâu tơdroăng hơ’lêh khât. Ôh tá pêi pro tiô tuăn tơná, pêi cheăng tiô túa ton, mê hiăng pơ’lêh tro tiô troăng, hơlâ dêi tíu xiâm pơkâ, mê cho a chê kuăn pơlê, ƀă kuăn pơlê ƀă  pêi cheăng ăm kuăn pơlê lĕm tro tâ.