Tung hơnăm 2022 lâp kong pơlê Dak Lak hiăng châ hlo ƀă pơxâu phak lối 3.200 rôh pro xôi tung kơvâ tê mơdró, tâk 316 rôh tâng vâ pơchông ƀă hơnăm hdrối, tung mê pơxâu phak tơdroăng xôi 39 rôh; pơxâu phak liăn 3.163 rôh. Tâi tâng kơxô̆ liăn nâp ing pơxâu phak lối 123 rơtal liăn. Mâu kế tơmeăm ki bro xôi ki hên cho: loăng tŭm túa, phon rơvât, pơkeăng xôh kơdê oâ hdrong, phom kơlôn, hmân ếo, yep chêng khŏng; kế xah vâi hdrêng, hât ki roê ki roê ing kong têa ê, hât điê̆n tưh.

A rôh hôp mơgêi hnoăng cheăng tơplâ mơdât mâu ngế ki tê mơdró kế ôh tá tro luât, lu lêa tung têa mơdró, kế tơmeăm ki tơkŭm tê a kơxê lơ 6/1, pôa Nguyễn Tuấñ Hà, kăn phŏ hnê ngăn Vi ƀan kong pơlê Dak Lak tối tiah kố, maluâ kơxô̆ ngế bro xôi ƀă kơxô̆ liăn pơxâu phak mâu ngế ki bro xôi tâk hên tâng pơchông ƀă hơnăm nah, la xuân tá hâi tối tơbleăng tro ki khât ‘na mâu tơdroăng cheăng ki bro xôi tung kơvâ cheăng kế tơmeăm a kong pơlê.

Tung la ngiâ ah, mâu kơvâ cheăng ki ai tơdjâk troh kal séa ngăn kơchơ tê mơdró, mơdêk ki tơƀrê tung hnoăng cheăng tối tơbleăng, hbrâ rơnáu tŭm mâu tơdroăng ki vâ rak tơniăn kơchơ tê mơdró, malối cho tung rôh Têt Quý Mão hiăng vâ chê troh la ngiâ.