Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa veăng hôp tối tơbleăng hnê mơhno a hneăng hôp. Veăng hôp ai 1.052 ngế kăn teăng mâ ăm mâu khu râ kuăn pơlê, mâu giai cấp, mâu kuăn ngo, mâu ki tiô khôp, mâu lêng tơplâ, mơngế Việt Nam rêh ối a kong têa ê ƀă kăn ƀô̆ Măt trâ̆n rêm râ, mơhno um méa kơhnâ rơkê dêi khu tơrŭm môi tuăn tâi tâng kuăn pơlê rêm hdroâng mơngế.

Ƀă tơdroăng pơkâ pơtối rak vế pêi tro tơdroăng ki lĕm ton nah, ivá rơdêi tơrŭm môi tuăn tâi tâng hdroâng mơngế rêm kuăn ngo, hneăng hơnăm 2024-2029, Hneăng hôp pơkâ 6 tơdroăng pêi pro, mê cho: Mơdêk tơdroăng hnê tối, mơhnhôk tơkŭm mâu khu râ kuăn pơlê, mơdêk môi tuăn dêi rơpó, pơtối rak vế ivá rơdêi tơrŭm môi tuăn tâi tâng hdroâng kuăn ngo. Mơdêk ki tơƀrê, tung tơdroăng séa ngăn ƀă tơpui rơkê tơpui leăng, pêi tro tiô tuăn kuăn pơlê, veăng mơjiâng Đảng, Tơnêi têa.

Mơhnhôk mâu khu râ kuăn pơlê tơ’noăng, hriăn plĕng, pêi tơƀrê mâu tơdroăng mơhnhôk, tơdroăng tơ’noăng. Pơtối rak hnoăng cheăng pro xiâm, ing tơdroăng rak ngăn kuăn pơlê, mơjiâng kơpong kuăn pơlê ối tơrŭm môi tuăn ƀă  dêi rơpó, phâi tơtô, hơniâp ro. Pêi cheăng tơƀrê ‘na tơpui kâ ƀă kuăn pơlê ƀă tơdroăng cheăng mơngế Việt Nam rêh ối a kong têa ê. Pơtối hơ’lêh nếo khu kăn cheăng, tơdroăng pêi cheăng ki kal, troăng hơlâ pêi cheăng; mơdêk ivá cheăng dêi kăn ƀô̆ Măt trâ̆n rêm râ.