Roh pơxiâm séa mơnhên ngăn ai lối 40 rơpâu ngế mê cho mâu khâu ối tung Khu lêng kuăn pơlê, Kŏng an kuăn pơlê, kuăn pơlê, khâu ki tâng ƀă khu lêng ki rêi prôa, hlŭm kĕng, tôu hơkâ, rơxế tơplâ, rơtế mâu khu kuăn pơlê ƀă tơdroăng ki veăng dêi kuăn pơlê.

Ki rơhêng vâ tối po pơxiâm séa mơnhên ngăn cho tơdroăng ki tơpui tơdrêng ing tíu mơ’no hyôh um Khánh Hòa, ƀă um clip lêng prôk pơtăng mâu khu lêng a têa kơxĭ, ai tơdroăng ki veăng dêi tuk mui tung têa kơxĭ, tuk pơto răng on, tuk răng on, mâu khu tuk kan sát gâk kring têa kơxĭ, khu séa ngăn tơnăng ká xi xŏng, khu lêng ƀok thái pơkeăng, tơƀai trưk thăng...

Rêm kơteăng chêng ó rơdêi, khu lêng sâp hmân ếo lĕm ối pơtâng, kŏng an ƀă khu kuăn pơlê hiăng pro mơnhông tơdroăng hâk tơngăm dêi hdroâng mơngế, mơnhông tơdroăng ki tơbâ khên tơnôu dêi Tơnêi têa tơnôu rơdêi tung tơplâ xâ, krá tơniăn tung mơjiâng ƀă gâk kring Tơnêi têa. Tiô pơkâ, ahdrối mot a Leh tơbâ păng ‘nâng a kơxo lơ 2/9, roh Tơkŭm po tâi tâng ăm lêng prôk pơtăng kô tơkŭm po tung kơxo lơ 30/8.