Rơtế khu pú hmâ xup um tơbâ ƀă châ hlo ki lĕm gá ai xêh sap ing nah a Gành Đá Đĩa, cheăm Tuy An, kong pơlê Dak Lak, nâ Đào Thị Hiền, tơmối ôm hyô troh ing pơlê kong kân Hà Nội đi đo kheăn kơdeăn drêng hlo kong kế lĕm, tơmeăm phá tơ-ê dêi kong kế hiăng pro ăm. Nâ Hiền tối, mâu nâ hiăng rah xo Dak Lak pro tíu ki troh tung troăng prôk ôm hyô rơnó pơtê hriâm vâ lăm ngăn kong kế ƀă châ tâ châ hlo tơdroăng ki nếo dêi môi kong pơlê nếo klêi kơ’nâi tơmot chiâng môi ai têa kơxĭ ai kong.

‘’Roh apoăng ngin troh ƀă kong pơlê Dak Lak nếo, châ ngăn têa kơxĭ Dak Lak, ngăn Gành Đá Đĩa, xup um a kố cho lĕm ‘nâng. Ngin xuân tơmiêt vâ lăm ngăn Phú Yên klêi mê to to lăm ngăn a Ƀuôn Đôn vâ châ tâ châ to tâi tâng tá têa kơxĭ tá kong. Mê cho nôkố lăm Dak Lak mê kô chiâng ôm hyô ngăn ngo ngăn têa kơxĭ. Môi tơdroăng ki phá tơ-ê cho ká xi xŏng a kố cho kơhiêm ƀă yă tơtro há’’.

Sap ing Tơnêi têa ai troăng hơlâ tơmot chiâng môi, tơmot 2 kong pơlê, ôm hyô Dak Lak – Phú Yên hiăng ai hên tơdroăng ki phiu ro. Kơxô̆ tơmối tâk hên xôh tâng pơchông ƀă hdrối. Ki rơhêng vâ tối, ôh tá xê to tơmối troh ing mâu kong pơlê ki ê mê kơxô̆ tơmối tung kong pơlê prôk lăm pơla 2 kơpong Peăng mâ hâu lo – Peăng mâ hâi Luô Dak Lak xuân tâk hên tâng pơchông ƀă mâu tơmối ki lăm hêi lơ khu rơpŏng hngêi. Nâ Nguyễn Thị Điểm, pêi cheăng tơdah tơmối a Rosa Alba Resort Tuy Hòa, Dak Lak tối ăm ‘nâi:

‘’Á hlo a chê kố drêng tơmot chiâng môi mâu kong pơlê ƀă dêi pó mê ôm hyô xuân kơdrâm phiu ro, tơmối xuân cho kơdrâm. A Rosa dêi ngin mê rêm kơpong pơrá ai, laga mâu khế achê kố mê hlo Peăng mâ hâi Luô Dak Lak chi a kố cho hên, cho kơdrâm. Á pói tơngah tơdroăng ôm hyô kơdrâm môi tiah kố mê xuân pói tơngah cho tơmối troh a kố kơdrâm tâ, hên tâ’’.

Tiô tơtro ƀă tơdroăng tơmot chiâng môi, mâu tíu pêi ôm hyô xuân hiăng tơdah tơdroăng xúa mâu tơmeăm têa kơxĭ – kong. Tiah mê a hngêi ăm tơmối ô kâ Đắk Phú, bêng Tuy Hòa, inâi krếo châ pơhlêh ing inâi 2 kong pơlê Dak Lak ƀă Phú Yên, ngoh Trương Tấn Tài, Pơkuâ hngêi ăm tơmối ô kâ tối ăm ‘nâi, tíu tê mơdró ôh tá xê to pơhlêh inâi tơdjêp têa kơxĭ – kong mê tơmeăm ki pế kâ xuân ai tơdroăng ki tơdjêp.

‘’Ngin pơxiâm po sap ing hâi lơ 1/6 mê sap ing khế 5 khu pế kơchâi kâ hiăng to a Dak Lak lăm séa ngăn rêm hngêi mơdró ô kâ, tơdroăng ki hâk vâ kâ, khôi túa lĕm tro a kơpong Dak Lak vâ djâ chu a kố mâu kơchâi kâ djâ ki phá tơ-ê dêi a mê môi tiah í pôh, tơxông prông, goih trŏng xăng, ...Tơdroăng ki rôe cho hôm ‘nâng, tơmối hâk vâ drêng troh akố châ kâ kơchâi kâ kơpong kong ngo Dak Lak rơtế mâu ká xi xŏng kơpong têa kơxĭ’’.

Klêi kơ’nâi tơmot chiâng môi, kơpong peăng mâ hâi Luô dêi Dak Lak ô eăng ƀă ôm hyô ngăn xí têa, kong, ôm hyô pơlê pơla, khôi túa lĕm chêng koăng, kơchâi kâ ki má môi Tây Nguyên. Ƀă kơpong peăng mâ hâi Lo ai tơmeăm ôm hyô têa kơxĭ, pơlê chài, mâu ká xi xŏng. Mâu câu ‘na Mô đô̆i hlâ tung tơplâ xâ Nam Tiến a Ƀuôn Ma Thuột châ pơtối hơ’muăn ‘na Vũng Rô ƀă mâu toăng tuk ‘’ôh tá ai krâ kơxô̆’’, mâu kơno tuk tơkâ têa kroăng Sê Rê Pốk ƀă Ƀlêi trâng Ƀuôn Ma Thuột. Pôa Ngô Văn Định, Phŏ Kăn hnê ngăn Khu tơrŭm ôm hyô kong pơlê Dak Lak tối, mâu tíu ki má môi dêi 2 kong pơlê ton drêng vêh tơkŭm chiâng môi kô chiâng tơdroăng ki rơdêi tŏng gum ăm 2 kơpong peăng mâ hâi Lo – Peăng mâ hâi Luô mơnhông lĕm tro tâ.

‘’Ngin kô tơ’nôm ăm dêi mâu mâu tơdroăng ki ton nah tro tơplê dêi péa kong pơlê vâ mơjiâng tơmeăm vâ ăm tŭm péa kơpong pơrá đi đo kô chiâng tơdah tơmối. Má péa nếo cho po rơdâ, pro kân lĕm tơraih tơƀai Tuy Hòa chiâng tơraih tơƀai lâp plâi tơnêi vâ tơdah tơmối troh ƀă Tuy Hòa klêi mê lăm Dak Lak. Má pái nếo cho hnê mơjiâng mơngế pêi cheăng vâ kum ôm hyô Dak Lak nếo, khôi túa lĕm tro thế ai tơdroăng ki tơmot, tơdroăng cheăng thế châ mơdêk’’.

Tơdroăng tơmot chiâng môi, tơmot kong pơlê hiăng mơjiâng ăm ôm hyô Dak Lak ai roh pro ƀă tiô troăng mơnhông nếo. Tơdroăng ki tơdjêp mâu tơmeăm ôm hyô ki phá tơ-ê, rơtế ƀă tơdroăng ki pro thăm lĕm hngêi trăng troăng klông ƀă hnê mơjiâng mơngế pêi cheăng, châ pói tơngah kô kum mơdêk kơvâ ôm hyô dêi kong pơlê mơnhông mơdêk ó rơdêi tung la ngiâ.