Hâi lơ 10/11, Khu ngăn mâu khu mơdró kâ hơnăm ối nếo kong pơlê Dak Lak tơkŭm po Rôh hôp Tơdjêp tê mơdró, tơrŭm tê mơdró ƀă ‘no liăn cheăng ƀă tơdroăng ki veăng dêi vâ chê 40 Khu mơdró kâ hơnăm ối nếo mâu kong pơlê, pơlê kong kân, kơvâ cheăng, kâu lăk ƀô̆ ối tung kong pơlê ƀă vâ chê 1 rơpâu ngế cho khu mơdró kâ hơnăm ối nếo tung lâp tơnêi têa.

Rôh hôp kố tơkŭm tung mâu tơdroăng “Hơ’lêh kơxô̆ mơdêk ki xiâm kế tơmeăm pêi lo ing chiâk deăng Việt”; Dak Lak – Tíu troh dêi khu ‘no liăn cheăng pêi chiâk deăng rơkê; Ăm kế tơmeăm pêi lo ing chiâk deăng tâk troh a mâu trang tê mơdró điê̆n tưh ƀă rôh tơ’lêi tê tơmeăm ngi kong têa ê dêi Dak Lak lăm troh a kong têa ê. Rôh hôp xuân tơbleăng mâu inâi tơdroăng tơkêa tơ’mot ‘no liăn cheăng a kong pơlê Dak Lak, tơpui tơno tối tơbleăng mâu rôh tơ’lêi tung ‘no liăn cheăng ƀă tơdroăng ki ai hlâu mơnhông dêi kong pơlê Dak Lak.

A rôh hôp ai 22 tíu pêi cheăng chêh inâi kĭ tơkêa rêm pâ tung hlá mơ-éa chôu vế ‘Tơdjêp tê mơdró, tơrŭm tê mơdró ƀă ‘no liăn cheăng”. Drêng kố, Khu ngăn mâu khu mơdró kâ hơnăm ối nếo Việt Nam diêp 2 toăng hngêi tơrŭm kơnâ 110 rơtuh liăn ăm mâu rơpŏng ki ai tơdroăng rêh ối xơpá a tơring Čư̆ Kuin, kong pơlê Dak Lak; diâp 50 hnoăng tơmeăm ăm mâu ngế ki tro trếo ‘mêi dioxin a kong pơlê, kơnâ 100 rơtuh liăn.