VOV4.Xơ Đăng - Kong tô khăng khoăng ton pro hên ƀăng kong, tung tâi tâng kơxô̆ lối 609 rơpâu ha kong pêt ƀă kong ki ai xêh dêi kong pơlê Kon Tum tơ’lêi tro on chếo kâ. Rơtế amê hâi khế kố xuân cho roh kuăn pơlê chôu chiâk deăng hbrâ ăm roh pêi pêt nếo xua mê kong tơ’lêi tro on chếo. Drêng ai tơdroăng mê khu cheăng kong pơlê Kon Tum rơtế khu pơkuâ gak ngăn kong ƀă khu râ kăn pơkuâ mâu tơring dế thăm pêi pro tơdroăng pơkuâ gak ngăn kong.

Chiâk deăng dêi kuăn pơlê achê ƀăng kong tơ'lêi on chếo

Mơnhên mâu ƀăng kong tơ’lêi chếo, tơ’lêi tro kếo ‘nhê kong vâ pro chiâk deăng, khu pơkuâ gak ngăn kong dêi kong pơlê Kon Tum rơtế ƀă khu pơkuâ gak ngăn kong ƀă khu râ kăn pơkuâ hiăng thăm pơtroh mơngế pêi cheăng gak plâ hâi plâ măng. Ƀă mâu kơpong kong tơkăng ƀă chiâk deăng pêt mơjiâng tơmeăm dêi kuăn pơlê, khu cheăng tơkŭm ăm kuăn pơlê kĭ tơkêa ôh tá kếo ‘nhê kong.

A Sa Ly tơplôu ƀă tơbleăng