A pơlê kong kơdrâm Ƀuôn Ma Thuột,  Tơdroăng “Hâi tâi tâng kuăn pơlê pleăng mơheăm” hơnăm 2023 tơ’mot hên lối 600 ngế cho mâu kăn ƀô̆, kŏng chưk, viên chưk, mâu lêng troh veăng pleăng mơheăm. Ing mê, châ xo 459 CC mơheăm. Chât hdrôh veăng pleăng dêi mơheăm, ngoh Nguyễn Văn Kiên, ối a bêng Tân Thành, pơlê kong kơdrâm Ƀuôn Ma Thuột,  tối:

“Á veăng pleăng dêi mơheăm hiăng 25 hdroh, hâi kố pơtối pleăng nếo. Klêi rêm rôh pleăng mơheăm a tâ dêi tung châ môi tiah hmâ, rêm hdroh pleăng tâ phiu ro tung hiâm mơno châ veăng kum mơheăm ăm mơngế ki dế kal vâ mơheăm tung mâu rôh vâi hiăng vâ hlâ’’.

Jâ Ayun H’Hương, Kăn hnê ngăn (Hội chử thập đỏ) cho Khu lo tŏng veăng kong pơlê Dak Lak ăm ‘nâi, mâu hơnăm a chê kố, kơxô̆ kơ koan, tíu pêi cheăng lêng, hngêi kơmăi, kŏng ti, hngêi trung hriâm tơkŭm po pleăng mơheăm rế hên ing mâu rôh po leh môi tiah Leh pleăng mơheăm rơnó hơngui, Hâi Tĭng pleăng mơheăm, Tơdroăng pêi pro pleăng mơheăm ƀă hên ki ê.

Tung mâu hâi leh pleăng mơheăm hiăng pro rôh ki tơ‘lêi ăm hên ngế vâ  pleăng  veăng ‘no hnoăng pro pơxúa kum mơ’rêh ăm mâu ngế châi tamo râ  ki dế kal vâ mơheăm. Tơdroăng leh tơbâ 23 hơnăm Hâi tâi tâng kuăn pơlê pleăng mơheăm cho rôh vâ hnê ăm kuăn pơlê hlê tâ nếo ki xiâm, ki pơxúa, tơdroăng ki lĕm dêi pleăng mơheăm tŏng kum mơngế, troh lâp lu chiâng tơdroăng hên ngế tung kuăn pơlê vâ pleăng dêi mơheăm.

“Xuân púi vâ hâi kố ƀă mâu hâi kơ ‘nâi mê hía ah kuăn pơlê tung lâp kong pơlê hlê hlối vâ pleăng mơheăm hên tâ. Tung la ngiâ ngin pơtối hnê kuăn pơlê hlê ‘na tơdroăng pleăng mơheăm vâ tơdroăng pleăng mơheăm a kong pơlê rế hên tâ nếo”.

Xuân apoăng khế Pŭn kố nah, Khu hnê mơhno pleăng mơheăm kong pơlê Kon Tum tơkŭm po Leh mơhnhôk pêi pro Hâi tâi tâng kuăn pơlê pleăng mơheăm lơ 7/4 ƀă pơxá: “Pleăng môi kơto mơheăm - cho hiăng mơ’rêh mơngế ối rêh’’.  Tiô tối tơbleăng a rôh leh mơhnhôk: tung mâu hơnăm hdrối, tơdroăng pleăng mơheăm dêi kong pơlê Kon Tum hiăng veăng ‘no hnoăng pêi kơhnâ khât tơdroăng khăm pơlât, rak ngăn ƀă mơdêk ivá kuăn pơlê mo lĕm.

Krê hơnăm 2022 kố nah lâp tung kong pơlê tơkŭm po 34 rôh pleăng mơheăm, pơtối châ xo lối 6.800 CC mơheăm, châ lối 136% tiô pơkâ dêi Khu hnê mơhno tơnêi têa mơhnhôk pơleăng mơheăm ai pơcháu.

Tơdroăng mơhnhôk pleăng mơheăm nôkố hiăng hlo po rơdâ troh tâi tâng mâu tơring, pơlê kong krâm ƀă mâu kơ koan, tíu pêi cheăng dêi kong pơlê Kon Tum chiâng môi tơdroăng pêi pro ki lĕm ‘na mơhno túa lĕm tro. Jâ Nguyễn Hoài Ven, Kăn hnê ngăn Khu lo tŏng veăng, ngế Phŏ pơkuâ hnê mơhno pleăng mơheăm kong pơlê Kon Tum, ăm ‘nâi:

“Hơnăm 2023 Khu lo tŏng veăng kong pơlê Kon Tum cho kơ koan Hnê mơhno kô tơkŭm po hên mâu tơdroăng pêi pro ƀă tơdroăng kân mê cho: Tơdroăng Leh pleăng mơheăm rơnó hơngui, Hâi tâi tâng kuăn pơlê pleăng mơheăm tŏng kum mơngế, Hâi lăm pleăng mơheăm ƀă hên ki ê. Ki xiâm dêi hơnăm 2023 kô châ xo ki iâ 7.200 CC mơheăm. Kuăn pơlê nôkố hiăng hlê khât ‘na tơdroăng pleăng mơheăm tŏng kum mơngế’’.

Khu hnê mơhno pleăng mơheăm kong pơlê Kon Tum pơkâ tung hơnăm 2023 kô mơhnhôk châ 1.500 ngế chêh inâi pleăng mơheăm ƀă tơkŭm xo mơheăm ăm châ 7.200 CC mơheăm ai tiô mơngế kal vâ mơheăm dêi Hngêi pơkeăng kân kong pơlê vâ kum pơlât ăm mâu ngế châi tamo râ ki dế kal mơheăm.

Klêi leh mơhnhôk Hâi tâi tâng kuăn pơlê pleăng mơheăm lơ 7/4, Khu lo tŏng veăng kong pơlê Kon Tum xuân hiăng tơkŭm tơdah xo mơheăm ing mơngế ki pleăng ƀă tung khế 4 kô mơhnhôk pleăng, tơkŭm châ xo 720 CC mơheăm.

Sap apoăng hơnăm, a pơlê kong kơdrâm Ƀuôn Ma Thuột, kong pơlê Dak Lak xuân hiăng tơbleăng pêi pro Tơdroăng “Hâi tĭng khêi’’ rôh má 15 a Tây Nguyên. Klêi leh mơhnhôk drêng kố hiăng ai lối 600 ngế sinh viên, giảng viên, kăn ƀô̆, mâu thái pơkeăng, ƀok thái pơkeăng ki dế hriâm tâp, pêi cheăng a Hngêi trung Đại học Y Dược Ƀuôn Ma Thuột, kong pơlê Dak Lak veăng pleăng mơheăm, vâ ai mơheăm ‘măn a Hngêi ‘măn rak mơheăm dêi tơnêi têa.

Hiăng ai 20 droh veăng pleăng mơheăm, ngoh Quốc Đình Khánh, Kăn kih thuât viên Kơvâ ngăn mơheăm, Hngêi pơkeăng Đại học Y Dược  Ƀuôn Ma Thuột tối:

“Kố cho môi tơdroăng pêi pro ai pơxúa khât, hlối kal, mơhno ki lĕm tro, veăng kum hên mơngế ki châi tamo. A xuân cho ngế cheăng ngăn pơkeăng mê a xuân hlê nhên tơdroăng pleăng mơheăm ga kal môi tiah lâi ƀă ôh tá pro ‘mêi ăm mơngế ki pleăng mơheăm mê á xuân mơhnhôk tâi tâng mâu vâi pú tâng ai tŭm ivá thế veăng pleăng dêi mơheăm .

Tơdroăng “Hâi tĭng khêi” rôh má 15 châ tơkŭm po a 3 tíu ki ê a Tây Nguyên mê cho a Hngêi trung Đại học Tây Nguyên, tơring Čư Mgar ƀă tơring Ea Kar dêi kong pơlê Dak Lak. Ƀă tơdroăng hnê “Pleăng mơheăm tŏng kum mơngế, tơdroăng ối rêh dêi pú ƀă á”, tơdroăng mê vâ tơbleăng troh lâp lu ki kơnía lĕm,  vâ ai mơheăm veăng ‘măn a Hngêi rak mơheăm tơnêi têa vâ tŏng kum pơlât teăm tơdrêng ăm mâu ngế châi tamo râ ki dế kal vâ mơheăm.