Ngoh Trần Hải Đăng, Kăn pơkuâ Tơdroăng XL02, tơdroăng tơkêa pro troăng kân Vũng Áng – Bùng, troăng tơkâ luâ kong pơlê Quảng Bình ăm ‘nâi: Nôkố tíu pêi cheăng mơhnhôk dâng 800 ngế kŏng nhân tơkŭm pro hâi măng, pro tung pơla Têt vâ mơ-eăm pro klêi tơdroăng tơkêa:

“Kŏng trương đi đo bâ eăng on, mơ-eăm tung pơla kong prâi tơniăn lĕm, ngin xoăng 3 ngế pơtối hlối, pêi plâ hâi plâ măng. A mâu tíu ki pro “troăng xiâm” dêi tơdroăng tơkêa môi tiah chiâ tâp, trêi, ngin klâ xoăng chiâng mâu tíu pro pơtối hlối. Rôh Têt vêh ƀă rơpŏng hngêi mê ro, la xua tơdroăng cheăng tơdjuôm, ngin ôh tá vêh a hngêi, veăng gum môi iâ ivá cheăng dêi tơná, mơ-eăm pro klêi mâu tơdroăng tơkêa ki kal dêi tơnêi têa”.

Lơ mâu tíu pro troăng mâu tíu ki ê troăng kân ing peăng Kơnhŏng troh peăng Hdroh, mâu tíu pêi cheăng ki pro troăng dế mơ-eăm mot tung mâu hneăng pro troăng hiăng vâ klêi, thăm mơdêk ivá pro ăm klêi, veăng gum pêi pro ƀlêi chiâng tơdroăng pơkâ pro 3 rơpâu km troăng kân tiô pơkâ dêi Ngế pro xiâm hnê ngăn Chin phuh. Tơdroăng tơ’noăng kố châ mâu ngế lêng Ƀinh đoàn 12 thăm mơdêk ivá tơbleăng, ƀă tơdroăng ki hâk vâ ƀă khŏm mơ-eăm khât, môi tiah tơdroăng ki tơpui dêi Đăi tă Nguyễn Tuấn Anh, phŏ kăn pơkuâ Ƀinh đoàn 12, phŏ kăn pơkuâ Kŏng ti xiâm Mơjiâng pro troăng Trường Sơn:

"Pro troăng prôk, ngin tơtrŏng troh tơdroăng cho kih thuât pro trêi tơnêi ôh tá krá. Kal athế pro klêi nếo pơtối pêi mâu tơdroăng ki pơtối. Rơhêng vâ rak vế tơniăn tơdroăng ki pro, ngin pơtroh mâu ngế pêi cheăng kơmăi kơmok tŭm, ing mê mơhnhôk tung rôh ki kak kố tơkŭm mâu ngế cheăng vâ pro troăng prôk, rế rak tơniăn tơdroăng ki pro ƀă ki dâi krá dêi troăng kân”.

Hơnăm 2025 kố, Pơlê kong kân Hồ Chí Minh xuân tơbleăng hên tơdroăng tơkêa pro troăng prôk ki kal, tung mê ai mâu troăng prôk, tơdjêp ƀă mâu troăng ki xiâm tơkâ luâ pơlê kong kân. Pôa Bùi Xuân Cường, Phŏ Kăn hnê ngăn Vi ƀan hnê ngăn Pơlê kong kân Hồ Chí Minh, ăm ‘nâi, pêi pro rôh tơ’noăng 500 hâi măng pro klêi mâu tơdroăng tơkêa pro troăng, kô tơkŭm pro mâu troăng ki kal ƀă tơdroăng ki khŏm mơ-eăm khât tơdjêp mâu tơdroăng tơkêa ƀă mâu troăng prôk ki kal, veăng gum mơnhông cheăng kâ rêh ối pơlê pơla dêi Pơlê kong kân Hồ Chí Minh ƀă tá kơpong peăng Hdroh:

“Hdrối Têt Lo hơnăm nếo kô ai dâng 10 to troăng prôk pơtối châ tơbleăng pro. Tơdrêng amê troăng ví 3, tung tơdroăng ki tơbleăng tơ’noăng dêi Ngế pro xiâm hnê ngăn Chin phuh, mê tơkŭm pro tung pơla rôh ki mơ’nui tung hơnăm 2025, vâ ăm pơxiâm pro troăng a tíu ki xŏn 15km, tơdjêp ƀă mâu troăng kân Pơlê kong kân Hồ Chí Minh – Long Thành – Giầu Dây tơdjêp ƀă Tơraih tơƀai lâp plâi tơnêi Long Thành. Mơnhông hiâm mơno tơ’noăng, rak vế tơdroăng ki pro mơnhông tung hơnăm 2025 vâ tơbleăng pro mâu tơdroăng tơkêa pro troăng prôk ‘na tơdroăng ki pro. Pakĭng mê, kô tơkŭm tơbleăng mâu tơdroăng vâ pro nếo môi tiah tơraih tơƀai lâp plâi tơnêi Cần Giờ”.

Rơtế ƀă mâu hâi apoăng hơnăm kố, pôa Trần Hồng Minh, Ngế xiâm ngăn troăng prôk ƀă rơxế kơtâu lăm ngăn, pôu mâu tíu ki pro troăng kân ing peăng Kơnhŏng troh peăng Hdroh. Nếo achê kố, a 2 tơdroăng tơkêa cho troăng kân Vũng Áng – Bùng ƀă Bùng – Vạn Ninh, troăng tơkâ luâ kong pơlê Quảng Bình hiăng pơkâ thế mâu khu ki ‘no liăn pro, mâu khu ki xo pro ngăn nhên tơdroăng ki pro troăng, pơtroh mâu kơmăi kơmok pro troăng vâ pro tung pơla Têt vâ ăm rơxế kơtâu a troăng xiâm môi tiah túa pơkâ.

Tiô pôa Trần Hữu Hải, Kăn pơkuâ Khu rak ngăn tơdroăng tơkêa 6, ngế ki ‘no liăn pro troăng, vâ rak tơniăn tơdroăng ki pro, Khu hiăng pơkâ thế khu ki xo pro pơtroh tơ’nôm mâu ngế cheăng pro troăng, ƀă mâu tơmeăm ki vâ pro, tơ’nôm chôu pêi, tơ’nôm mâu ngế pro, troăng hiăng pro klêi châ lối 70%, tiô tối hdrối kô klêi klăng a hâi lơ 30/4/2025.

Tơdjâk troh tơdroăng ki xo tơnêi a kong pơlê, pôa Trần Phong, Kăn hnê ngăn Vi ƀan kong pơlê Quảng Bình ăm ‘nâi, troh nôkố, kong pơlê hiăng pơcháu tơnêi krúa ăm mâu tíu ki pro. Laga, nôkố tơdroăng tơkêa pro troăng a kong pơlê xuân ối ai dâng 40 rơpŏng kuăn pơlê rơhêng vâ châ ‘mâi xê̆n troh tíu ối nếo. ‘Na tơdroăng kố, pôa Trần Hồng Minh, ngế xiâm pơkuâ ăm ‘nâi, kố cho tơdroăng púi vâ khât, kal ai hâi khế vâ tơleăng gum. Ki hdrối tâ Khu xiâm ƀă mâu khu xo pêi tơdroăng kô tơkŭm vâ pro klêi ƀă ăm kơtâu klăng a lơ 30/4/2025.

Malối, hơnăm 2025 ƀă tơdroăng ki ăm hên tơdroăng tơkêa pro troăng ki kal kơvâ ngăn troăng prôk veăng pêi cheăng, tơdrêng amê hlối pêi klêi mâu pơkâ 3 rơpâu km troăng kân cho tơdroăng cheăng kal ai tơkŭm khât vâ pro klêi. Pôa Trần Hồng Minh, Ngế xiâm ngăn troăng prôk ƀă rơxế kơtâu, tơhrâ:

"Hên tơdroăng tơvâ, xơpá ôh tá tơniăn hiăng châ tơkŭm tŏng gum môi tiah ‘na xo tơnêi, liăn roê hmốu prêi pro, xúa ăm tơdroăng tơkêa, malối cho kơpong peăng Hdroh. Troh nôkố, tơdroăng ki pro troăng ki kal kố châ rak vế tơniăn. Ai mâu tơdroăng tơkêa pro troăng kân ing peăng Kơnhŏng troh peăng Hdroh môi tiah troăng kân Quảng Ngãi – Khánh Hòa tiô tối hdrối kô tơkâ luâ túa pơkâ 3 – 6 khế. Khu xiâm kô thăm mơdêk tơrŭm, rak vế pêi pro tro mâu hnoăng cheăng pêi tung hơnăm 2025”.

Hlê plĕng nhên tơdroăng hnê mơhno dêi Ngế pro xiâm hnê ngăn Chin phuh: “Xơpá u lâi mê tŏng gum a mê” ƀă “Pôi tối ôh, pôi tối pá”, Khu xiâm ngăn troăng prôk ƀă rơxế kơtâu hbrâ tơrŭm ƀă mâu Khu xiâm, kơvâ cheăng ki ai tơdjâk troh mơjiâng tôh pêi cheăng tơdrêng pêi cheăng ƀă mâu kong pơlê tơbleăng mâu troăng hơlâ, gum khu ki xo pêi mâu tơdroăng tŏng gum vâi thăm mơdêk mơ’no mâu tơdroăng tơkêa pro troăng prôk rĕng klêi, rơtế pêi pro pơhlêh tơdroăng pơkâ 3 rơpâu km troăng kân a hơnăm 2025 kố tro môi tiah pơkâ mơ’no, veăng gum mơdêk cheăng kâ tơnêi têa tung hneăng ki nếo.