Ngoh Siu Pốp (hdroâng Jarai) a pơlê Anh, cheăm Ia Bang, tơring Čư̆ Prông, kong pơlê Gia Lai, cho kŏng nhân Nông trường Hòa Bình, Kŏng ti Cao su Chư Prông ăm ‘nâi, tíu pêi cheăng kố ai lối 260 ngế kŏng nhân cho hdroâng kuăn ngo, châ vâ chê 92% tung tâi tâng kơxô̆ ngế pêi cheăng dêi nông trường.

Tung “Khế kŏng nhân” hơnăm 2025, Kŏng ti hiăng tơkŭm po hên tơdroăng pêi pro ki ai pơxúa vâ tŏng gum tơdroăng rêh kâ ối ăm mâu ngế pêi cheăng.

“Sap ing rôh ki mot pro kŏng nhân kơxu, châ tơdroăng tŏng gum ƀă hnê mơhno dêi kăn pơkuâ, ngin pêi pro tro pơkâ mơjiâng pro ƀă djâ pơxúa tơƀrê pêi lo liăn tơniăn. Nôkố, tơdroăng rêh kâ ối dêi kŏng nhân kơxu chía niân tâ; sap ing liăn kâ, liăn hrê tung rơpŏng hngêi hiăng pơhlêh. Ngiâ méa pơlê cheăm nôkố hiăng pơhlêh, hiăng ai on tơhrik trâ bâ eăng. Nôkố troăng prôk xuân hiăng ok ƀê tong, tôh chhá kơxu. Hdrối nah mê gá xơpá khât, hngêi trăng xuân ôh ti ai vâ ối, la nôkố hngêi trăng hiăng châ pro lĕm krá kâk, tơdroăng rêh ối ki phá hên”.

Châ ‘nâi tung “Khế kŏng nhân” hơnăm kố, Liên đoàn Lao động kong pơlê Gia Lai hiăng diâp kơxô̆ liăn tŏng gum mơjiâng pro, ‘mêng rơnêu 25 toăng hngêi “Hngêi hơtôu Kŏng đoân” ăm mâu ngế pêi cheăng ki ai tơdroăng rêh ối pá puât.