Mơ’nui khế 3/1975, drêng mâu tíu tơplâ a peăng Hdroh pơhlêh rĕng, Đăi tươ̆ng Võ Nguyên Giáp hiăng pơkâ thế Khu xiâm pơkuâ ngăn Kuân khu 5 ƀă Khu pơkuâ ngăn lêng têa kơxĭ rĕng tơleăng chuăn Trường Sa. Klêi kơ’nâi mê, môi tíu pêi cheăng pêi hnoăng cheăng ki tơviah châ mơjiâng, tung mê ai khu lêng Lữ đoàn 126 Đặc công Khu lêng tuk tơrŭm ƀă ƀô̆ ƀinh, tối tơbleăng tơdroăng kal, mâu tíu pêi cheăng ki tŏng gum ối tung Kuân khu 5.

Vâ rak tơniăn tơdroăng ki kơtoâ pơkí, kơdrâ, mâu plomng tuk pơto chơ lêng châ rơnuâ pro chiâng plong tuk ki kơnăng ká xi xŏng dêi kong têa ê. Mố đô̆i kơtoâ dêi tơná tung mâu kơbong tuk, klôh ki ‘măn tơmeăm, mơeăm prôk tung tơdroăng ki têa dế tơniăn ƀă ai tơdroăng rơ-iêo. Kơxê hâi 13/4/1975, mâu tuk dêi pin hiăng prôk troh a chuăn Song Tử Tây. Kơxo má hâi kơ’nâi, khu lêng đặc công a têa, ƀô̆ ƀinh vâi pơtối pĕng hnêa, po môi rôh plâ ƀâ ki têi rĕng a chuăn.

Maluâ trâ, hên trâm hên tơdroăng ki mơdât ó khât la kơnôm ing tơdroăng ki môi tuăn, tơdroăng ki kal pro kơdrtâ, bu klêi kơ’nâi 30 phut tơplâ, khu lêng tơleăng hiăng châ pơkuâ ngăn chuăn Song Tử Tây. Mê cho rôh hnêa pĕng po troăng ăm rôh tơplâ tơleăng tâi tâng chuăn Trường Sa.

Pôa Trần Đăng Ninh, 70 hơnăm, pơlê xiâm Hải Hậu, Nam Định, mố đô̆i đặc công hneăng hdrối veăng tơplâ ƀriê tung hiâm mơno chôu vế:

“Rôh tơplâ kố cho pơkí, kơdrâ plâ hnâp, peăng khu lêng Sài Gòn vâi ôh ti ‘nâi ngin hiăng mot plâ rĕng môi tiah mê. Drêng mê nah, tơdroăng a tơnêi ối ai hên tơdroăng ki ôh tá tơniăn, a têa kơxĭ hên plong tuk dêi xâ dế pêi cheăng, thăm nếo ai tá tơdroăng ki veăng ngăn dêi khu xâ pa gong. Klêi kơ’nâi hâi lơ 14/4, xoăng đô̆i đặc công ngin ối rak ngăn chuăn, mâu khu ki chơ mố đô̆i tro rong, mâu ngế ki tro kroăng phâk vêh a Đà Nẵng”.

Pơtối ivá ƀlêi trâng, hâi lơ 21/4/1975, ƀiên đô̆i tuk plong má péa pơtối tơkâ luâ lăm lo a têa kơxĭ, vâ tơleăng lĕm mâu chuăn Sinh Tồn, Nam Yết, Trường Sa, Sơn Ca ƀă hên ki ê. Hâi lơ 29/4/1975, mâu chuăn ối tung chuăn Trường Sa hiăng châ tơleăng. Trung ŭi Nguyễn Văn Mỹ, ngế ki séa ngăn ối tung Sư đoàn 2 ối tung Lưh đoàn 126 hneăng hdrối tối, kơxê hâi lơ 30/4, rêm ngế tâng tơdroăng ki châ tơleăng Sài Gòn ing tơdroăng nếo ai dêi Rơ’jiu Việt Nam, vâi ƀriê khât ôh pá chiâng tối:

“Drêng mê nah, ngin dế ối chuăn Song Tử Tây, tơpui tơbleăng gá xơpá khât. Drêng Rơ’jiu Việt Nam tơbleăng hiăng châ tơleăng tâi tâng peăng Hdroh, tâp hlá cơ dinh Độc Lập, nhŏng o ngin phiu ro khât, têa kŏng,phiu ro khât.Drêng ‘nâi tơleăng, ngin hiăng pâ troh mâu vâi pú ki hiăng hlâ hdrối hâi chôu vâ hơniâp lĕm”.

Klêi kơ’nâi 50 hơnăm châ tơleăng, tơring chuăn rơlốu Trường Sa hâi kố dế mơeăm tơná rơdêi tung tơdroăng tơnêi têa ‘na cheăng kâ têa kơxĭ, cho “plâi nuih” tung dế têa kơxĭ Biển Đông, veăng gum mơdêk tíu ối tơnêi têa a lơgât têa kỡĭ chuăn rơlốu lâp plâi tơnêi. Pôa Nguyễn Tấn Tuân, Kăn hnê ngăn Vi ƀan kong pơlê Khánh Hòa ăm ‘nâi, tung la ngiâ ah, kong pơlê pơtối pêi tơƀrê tơdroăng cheăng kal kí, mơdêk ki rơkê plĕng tơdroăng rêh ối ăm khu lêng ƀă kuăn pơlê mâu chuăn rơlốu; mơdêk hnê tối, mơdêk ki rơkê plĕng ‘na Trường Sa tung pơlê pơla. Pôa Nguyễn Tấn Tuân tối rơdêi, ki xiâm cho vâ ăm Trường Sa chiâng tíu xiâm cheăng kâ – pơlê pơla rơkê plĕng tung dế têa kơxĭ Biển Đông, tơdrêng amê hlối cho tíu ki krá kâk rak vế hnoăng pơkuâ Tơnêi têa:

“Rak tơniăn tro má môi, môi pâ cho mâu tơdroăng tŏng gum, troăng pơlâ ki ê athế pro chiâng tíu ki pêi lo liăn ăm kuăn pơlê tơnăng ká xi xŏng. Mâu rơpŏng rế veăng pêi cheăng rế veăng rak vế hnoăng pơkuâ têa kơxĭ, chuăn rơlốu. Khu lêng Têa kơxĭ, kong pơlê Khánh Hòa rơtế ƀă dêi rơpó rak ngăn tơring chuăn rơlốu. Mê cho ivá mơhnhôk kân, vâ rêm ngế kuăn pơlê a tơnêi xuân môi tiah a chuăn rơlốu hlo ki tĭng lĕm má môi cho hnoăng pơkuâ, tơniăn krê dêi Tơnêi têa”.