Vi ƀan hnê ngăn kong pơlê Lâm Đồng dế mơ-eăm vâ pêi pro klêi mâu hồ sơ hlá mơ-éa, tối tơbleăng hriăn ngăn ƀă mâu tơdroăng ki ai tơdjâk troh vâ pêi pro troh tơdroăng tơbleăng pêi pro 2 tơdroăng tơkêa troăng kân Tân Phú – Bảo Lộc ƀă Bảo Lộc – Liên Khương, tơdjêp troăng prôk dêi kong pơlê ƀă Pơlê kong kân Hồ Chí Minh ƀă mâu kong pơlê peăng hdroh. Tơdroăng tơkêa ‘no liăn bro troăng kân Tân Phú – Bảo Lộc ki xŏn dâng 66km, tung mê 11km prôk tơkâ luâ tơring Tân Phú, kong pơlê Đồng Nai ƀă 55km ối tung kong pơlê Lâm Đồng.

Rơtế ƀă troăng prôk kân tơdrăng Tân Phú – Bảo Lộc, Vi ƀan hnê ngăn kong pơlê Lâm Đồng xuân dế mơdêk tơdroăng ki tơbleăng bro troăng kân tơdjêp cho Bảo Lộc – Liên Khương ai ki xŏn 74km, túa pơkâ 4 to troăng rơxế, ƀă tâi tâng kơlo liăn ‘no tiô tối hdrối cho 19.521 rơtal.

Mâu tơdroăng tơkêa pro troăng prôk Tân Phú – Bảo Lộc ƀă Bảo Lộc – Liên Khương cho troăng prôk ki xiâm, tơdjêp troăng tê mơdró dêi kong pơlê Lâm Đồng ƀă Pơlê kong kân Hồ Chí Minh ƀă mâu kong pơlê peăng Hdroh. Drêng mâu troăng prôk kố hiăng bro klêi kô cho ivá kân mơdêk cheăng kâ rêh ối pơlê pơla dêi Lâm Đồng ƀă mâu kong pơlê tung kơpong mơnhông.