Tơdroăng mơjiâng Pơkâ vâ pêi pro tŭm, teăm tơdrêng mâu troăng pơkâ pêi, troăng hơlâ dêi Đảng 'na mơnhông mơdêk hnoăng kuăn pơlê pơkuâ dêi hnoăng cheăng, rak tơniăn hnoăng tơniăn loi tĭng, tiô khôp dêi rêm ngế, tơtro ƀă tơdroăng cheăng kâ - rêh ối pơlê pơla dêi Việt Nam. Môi tung mâu tơdroăng xiâm dêi kơxop hlá mơ-éa Pơkâ cho pơtối pro tơ'lêi hlâu tơdroăng pro mơ-éa, mơdêk tơdroăng tơbleăng, tơdrăng, mơdêk xúa kŏng ngê̆ thŏng tin ƀă pơhlêh xúa kơxô̆ tung kơvâ loi tĭng, tiô khôp, ing mê rak tơniăn rế hía rế tro tâ hnoăng loi tĭng, tiô khôp.

Tung pơla mơjiâng, mâu tơdroăng pơkâ châ hriăn plĕng, tơmiât nhên vâ rak tơniăn tơtro ƀă mâu tơdroăng pơkâ 'na hnoăng kuăn mơngế châ chêh tối tung hlá mơ-éa tơbleăng lâp plâi tơnêi 'na hnoăng kuăn mơngế hơnăm 1948 ƀă tơdroăng tơkêa lâp plâi tơnêi 'na mâu hnoăng kuăn mơngế ƀă pơkuâ xêh hơnăm 1966 ki Việt Nam cho khu tơrŭm cheăng; tơdrêng amê rak tơniăn hnoăng kuăn mơngế, hnoăng kuăn pơlê ƀă mơdêk ki tơƀrê, châ tơƀrê pơkuâ tơnêi têa.