Pơtối trâm mâ, tơrŭm tơrôa ƀă tơrŭm cheăng pơla kuăn pơlê Việt Nam - Kul roh má 5, kơxê hâi lơ 7/11,  a kong pơlê Dak Nông hiăng po tơdroăng trâm mâ, tơpui tơno pơla mâu Kăn dêi péa tơnêi têa Việt Nam - Kul ƀă mâu lêng ki pleăng hnoăng tơná, mâu ngế rơkê, mố đô̆i gak tơkăng kong ƀă mâu rơtăm kong pơlê Dak Nông. Veăng hôp mê, peăng Kul ai pôa Vann Phal, Ngế kum pêi hnoăng cheăng dêi pôa Hun Sen, Ngế pro xiâm hnê ngăn kong têa, Kăn xiâm hnê ngăn Tơrŭm cheăng pơla Kul - Việt Nam pro xiâm pơkuâ jâ khu kăn teăng mâ mâu kăn xiâm, kơvâ cheăng, mâu kong pơlê kong têa Kul.

A rôh trâm mâ, kăn teăng mâ hơnăm ối nếo veăng hôp trâm mâ, nâ H’Hồng, Kăn phŏ hnê ngăn Đoân Droh rơtăm kong pơlê Dak Nông tối mơnê, nhoăm kơ hnoăng hiăng pleăng ta troh hlâ dêi mâu ngế rơxông pâ pôa xua tơdroăng vâ pro hơniâp lĕm, ƀă mơjiâng tơrŭm krá pơla péa tơnêi têa Việt Nam - Kul. Hơnăm ối nếo Dak Nông tối krê ƀă hơnăm ối nếo péa tơnêi têa tối tơdjuôm kô pơtối ‘no ivá mơnhông mơdêk  tơrŭm cheăng mê.