Kơxô̆ ki tâk ‘na mung liăn hngêi rak liăn gum mâu kơtiê dêi tơring tâng riân rêm hơnăm châ 12%. Lâp tung tơring ai 4 tôh tơkŭm ăm mung (tung mê ai Khu ngăn vâi kơdrâi). Troh nôkố, hiăng ai lối 11 rơpâu ngế, ƀă tâi tâng kơxô̆ liăn chĕn dâng 550 rơtăl liăn.  Cho tơring ki ai hên kuăn ngo lối 70%, tơring Krông Pa malối  tơmâng khât troh mâu rơpŏng kuăn ngo drêng châ mung liăn ing hngêi rak liăn kum mâu kơtiê vâ mơnhông cheăng kâ.

Jâ Ksor H’Drui - Kăn hnê ngăn Khu vâi kơdrâi cheăm Chư Drăng, tơring Krông Pa ăm ‘nâi, tơring nếo tơbleăng túa pêi pro “Pơlê vâi kơdrâi pêi cheăng tiô túa’’ vâ pro hlâu ăm vâi nâ o tung khu châ hriâm ing dêi rơpó tung pêi cheăng kâ, pêi chiâk deăng, xúa liăn mung pêi cheăng ai pơxúa tơƀrê:

“Vâ vâi nâ o xúa kơxô̆ liăn mung ing hngêi rak liăn gum mâu kơtiê tro tiô tơdroăng, mê ngin xuân hiăng tơkŭm hnê mơhno ăm vâi nâ o kơdrâi. Klêi mung liăn mê pin thế xo kơxô̆ liăn mê ‘no tung pêi chiâk rôe phon lơ tơmeăm păn vâ mơnhông tơdroăng rêh ối. Pơla hdrối kố nah, á xuân hiăng tâng teăng mâ gum vâi nâ o mung liăn, ing kơxô̆ liăn mê hên mâu rơpŏng xuân hiăng ‘nâi ‘no tung pêi chiâk deăng, păn mơnăn. Ta troh nôkố hiăng hên rơpŏng hiăng xúa liăn ki mung ing hngêi rak liăn gum mâu kơtiê pêi cheăng kâ châ tơƀrê mơnhông dêi rơpŏng hngêi’’.