VOV4.Sêdang - Hâi lơ 5/10, tung ƀai xông tơpui pơxiâm po Hneăng hôp roh má 4 Khu xiâm pơkuâ Đảng hneăng má XIII, pôa Nguyễn Phú Trọng, Kăn xiâm pơkuâ hnê ngăn Đảng hiăng tối mâu tơdroăng cheăng kâ – rêh ối pơlê pơla hơnăm 2021 – 2022. Ing mê ăm hlo, tơdroăng pơtâng tối hnê ó rơdêi dêi Đảng ƀă Tơnêi têa cho pơtối pơkâ tơniăn hdrối pơreăng COVID-19; tơniăn tăng cheăng pêi, rak ngăn ivá dêi kuăn pơlê; laga mê cho mơ’no mâu troăng vâ mơnhông ƀă mơnhông mơdêk cheăng kâ tung mâu khế ki ê nếo dêi hơnăm ƀă pơkâ ăm hơnăm 2022 la ngiâ.

Hneăng hôp roh má 4 Khu xiâm pơkuâ Đảng hneăng má XIII dế tơkŭm po a pơlê kong xiâm Hà Nội

Ƀă tơdroăng pơkuâ kơtăng, kơchăng, pơkâ mơ’no hên troăng pêi ki tơtro ƀă rêm roh dêi Đảng, Tơnêi têa, Chin phuh, tơdroăng cheăng kâ – rêh ối pơlê pơla 9 khế hiăng hluâ hiăng châ tơƀrê hên. Xêo tơdjuôm 9 khế, tơdroăng pêi kâ, tê mơdró xuân ối pơtối rak. Mâu tơdroăng ki hôm dêi cheăng kâ cho tơtêk tơdroăng ăm mung liăn châ 7,17%, tŏng kum ăm tơtêk cheăng kâ 9 khế hơnăm 2021. Tâi tâng kơlo mơhnhôk mơ’no liăn tung kơchơ tê mơdró chưng khoăn ăm tơdroăng cheăng kâ tâk 12% ƀă hía hé.

            A Sa Ly tơplôu ƀă tơbleăng