VOV4.Xơ Đăng - Sap apoăng khế 11 hơnăm 2021 troh nôkố, kong pơlê Gia Lai hiăng châ hlo ai mâu kơpong ki tâ tú pơreăng COVID-19 a mâu pơlê cheăm dêi hdroâng kuăn ngo a pơlê kong kơdrâm Plei Ku ƀă tơring Đăk Đoa. Tơdroăng ki tâ tú pơreăng kố châ mơnhên tối xua ing tơdroăng ki kuăn pơlê pêi pro tiô khôi hmâ dêi pơlê pơla, mê cho ing tơdroăng pôu ngăn ai mơngế hlâ.

Mâu hâi ki kố, cheăm Hà Bầu, tơring Đăk Đoa chiâng tíu ki tâ pơreăng nếo a kong pơlê Gia Lai. Tung lối măng tĭng hiăng hluâ, cheăm hiăng châ hlo vâ chê 200 ngế tro tâ COVID-19 a 6 pơlê hdroâng kuăn ngo. Tung mê, krê pơlê Nú ai 88 ngế. Ki hên mâu F0 kố châ mơnhên hiăng veăng ôu kâ a môi tíu ‘mế kiâ tơkŭm po 2 hâi lơ 10 ƀă 11/11. Jâ Dương Thị Kim Quy – Kăn phŏ hnê ngăn Vi ƀan cheăm Hà Bầu, tơring Đăk Đoa tối ăm ‘nâi:

‘’Khu hnê mơhno ai pơcháu ăm tôh COVID-19 pơlê pơla a thôn, kơdroh tơkŭm kơdrâm mơngế; mơngế pa gong dêi pơlê, cheăm mê chêh inâi. Pơtih, mơngế Xuăn hlo pơreăng môi tiah mê, mê bu troh tâp nhâng, klêi mê vêh. Laga, vâi krâ hdroâng kuăn ngo mê tơ-ê, thế ‘nân rup kŏng dêi pó, tơpui tơno ƀă dêi pó, kâ môi iâ kơchâi, ôu môi kơ’lo drôu ‘nôi. Xua mê, pá puât tung hbrâ, mơdât pơreăng’’.

Tiô khôi túa, lâp pơlê veăng tơlo tơmeăm rơtế ƀă rơpŏng tơkŭm mơdâm kiâ plâ 3 hâi

Ƀă a pơlê kong kơdrâm Plei Ku, nôkố tŭm 3 pơlê Jarai pơrá tro kâng kơxái mơdât ôh tá ăm lo pa gong xua châ hlo hrĭng ngế tro tâ COVID-19, xuân tơdjâk troh mâu tíu ‘mế kiâ. Pôa Rơ Châm Thót – Kăn pơkuâ hnê ngăn chi ƀô̆ pơlê Ốp, bêng Hoa Lư – pơlê kong kơdrâm Plei Ku tối ăm ‘nâi, tơdroăng tơkŭm ‘mế kiâ tiô khôi vâi krâ nah drêng pơreăng dế xông tâ tú ó tiah kố pro pơlê ai 77 ngế tro tâ pơreăng:

‘’Drêng ai ngế hlâ mê vâi krâ nhŏng o hmâ tơkŭm, vâi ai drôu  xiâm mê djâ vâ hơlêm tơdroăng khéa hơ’nêng; chu, í mê nhŏng o, tiô ivá dêi nhŏng o tung rơpŏng. Ki hên cho í, chu, ‘nân tơdjuôm, ôu tơdjuôm. Tơkŭm po 2 troh 3 hâi, hâi má 4 nếo tâi, tơdjâk troh ivá, cheăng kâ. Nôkố xuân ối rak tiah mê, tá hâi xut tah lôi’’.

Hên pơlê hdroâng kuăn ngo a tơring Đăk Đoa, Gia Lai dế kâng kơxái mơdât ôh tá ăm mot lo pa gong vâ ti tăng mâu ngế F0, F1 lo ing pơlê pơla

Nôkố, a Gia Lai ai dâng 1.000 pơlê dêi mơngế hdroâng kuăn ngo ối tung 17 tơring, pơlê krâm, pơlê kong kơdrâm. Ƀă mơngế hdroâng kuăn ngo a Tây Nguyên, tơdroăng ki pơlê pơla châ mơhno trâu hơngế tung mâu tơdroăng pêi cheăng kâ, tơdroăng rêh ối mơhno túa lĕm tro. Laga drêng pơreăng COVID-19 dế xông tâ tú ó, kố pơtối chiâng tơdroăng ki mơdât ƀă tơdroăng hbrâ mơdât pơreăng dêi kong pơlê.

Pôa Lê Văn Quang  - Kăn hnê ngăn Vi ƀan bêng Hoa Lư, pơlê kong kơdrâm Plei Ku tối ăm ‘nâi, vâ tah lôi tơdroăng kố, kal tơdroăng ki pêi kơtăng dêi khu cheăng kal kí, ki rơhêng vâ tối cho mơnhông hnoăng dêi mâu ngế ki loi tơngah tung pơlê pơla, pơtâng tối mơhnhôk kuăn pơlê môi tuăn, pêi tiô pơkâ, môi tuăn mâu troăng hbrâ mơdât pơreăng:

‘’Tung pơla kâng kơxái mơdât ôh tá ăm mot lo pa gong, a pơlê Ốp ai môi rơpŏng mế kiâ. Ngin hiăng tơkŭm khu cheăng kal kí vâ pơtâng tối ăm rơpŏng ai ngế hlâ, mơnhên troăng tơmiêt: Ôh tá tơkŭm po a hngêi. Klêi kơ’nâi rơpŏng môi tuăn tơdroăng pơtâng tối, mê hbrâ chiâ klôh, ‘mế kiâ, tơkŭm ‘mé hlối, ôh tá tơkŭm, ví tơdroăng tơkŭm ôu kâ drêng ‘mế kiâ dêi kuăn pơlê’’.

Nguyễn Thảo chêh

A Sa Ly tơplôu ƀă tơbleăng