VOV4.Sêdang - Čư̆ Êlang cho cheăm ối kơpong hơngế hơngo dêi tơring Ea Kar, kong pơlê Dak Lak, cho tíu ki tơkoh tơkăng kong ƀă cheăm Vụ Bổn, tơring Krông Pač; cheăm Čư̆ Pui, tơring Krông Bong ƀă cheăm Čư̆ Bông, tơring Ea Kar. Tâi tâng 3 to cheăm ki tơkoh dêi pó mê pơrá ai khu kuăn pơlê ki tâ tú pơreăng COVID-19. Krê cheăm Čư̆ Êlang ối a tơdế 3 to cheăm ki ai mơngế tâ pơreăng, la kơnôm ai tơdroăng ki môi tuăn môi mơno dêi kuăn pơlê ƀă rak vế, pêi pro kơhnâ khât hnoăng cheăng tơplâ mơdât pơreăng, tơdrêng ƀă tơdroăng pơkuâ pơkâ thế dêi khu pơkuâ ngăn cheăm bêng, mê cheăm Čư̆ Êlang ôh tá ai ngế ki tro tâ pơreăng COVID-19, kring vế, rak tơniăn tung tơdroăng mơnhông mơdêk pêi cheăng kâ, rêh ối pơlê pơla. Ƀai chêh dêi Minh Huệ, Ngế chêh hlá tơbeăng cheăng tung Rơ’jíu Việt Nam hiăng lăm troh a cheăm Čư Êlang vâ chêh tối ‘na tơdroăng mê.

Tíu klâ krê tơchoâm pơkâ pro a Hngêi pơkuâ kâng rơchôa Ea Rớt kơtăn hơngế kơpong kuăn pơlê la lĕm krúa. Kố cho tíu klâ kơtăn ƀă mâu kuăn ‘nĕng dêi Čư Êlang ki vêh ing mâu kong pơlê peăng Hdroh vâ hbrâ mơdât pơreăng COVID-19. Pêi dêi hnoăng cheăng akố, Ngế phŏ pơkuâ hngêi pơkeăng cheăm Čư Êlang, cho  nâ Nguyễn Thị Yến ăm ‘nâi, tíu ki kố nếo châ tơbleăng pro kơpong klâ krê ing mơ’nui khế 9. Hdrối mê, cheăm ai 2 kơpong klâ kơtăn tơchoâm pro a Hngêi trung râ má pái Phạm Hồng Thái ƀă Hngêi trung râ má môi Nguyễn Thái Học.

Pơla mơ’nui khế 7/2021, tŭm 2 kơpong klâ ối kơtăng 208 ngế ki vêh ing kơpong ai tâ pơreăng. Châ kuăn pơlê a tơring kố ƀă mâu khu ai tuăn hơ-ui kum veăng ăm phái, kơchâi, rêm ngế hmiân tuăn rak vế pêi pro tro tiô pơkâ klâ ối kơtăn tơchoâm tung pơla 14 hâi, klêi mê pơtối klâ krê a hngêi tơ’nôm 14 hâi nếo. Mơ’nui khế 8, bú ối 10 ngế thế klâ krê tơchoâm, djâ vâi lăm klâ krê a hngêi kâng rơchôa Ea Rớt, tơvêh mâu hngêi trung hriâm vâ kơpuih, xut  mơgrúa, xôh pơkeăng kơdê pơreăng vâ hbrâ ăm vâi o hriâm hơnăm nếo.

Nâ Nguyễn Thị Yến tối, kơnôm môi tuăn dêi kuăn pơlê rơtế ƀă mâu khu râ kơvâ cheăng a cheăm Čư Êlang hiăng kâi mơdât pơreăng COVID-19 tâ tú tung cheăm:  

“Cheăm tơbleăng tâi tâng mâu tôh veăng pêi cheăng ‘na mơdât COVID tung kuăn pơlê, mâu ngế cheăng ngăn pơkeăng thôn pơlê, khu rak ngăn drêng châ ‘nâi ai ngế ki lâi vêh ing kơpong dế ai pơreăng, pơtih vêh ing Vụ Bổn, Čư Bông thế tơbleăng tơdrêng hlối, vâ tối pêi pro tro. Môi tiah ngế ki nếo tối mê âi, ai 2 ngế lo ing Čư Bông lăm ôu kâ nhâ̆u vâi ‘nâi ƀă hiăng djâ prếi lăm ối a kơpong klâ krê. Kơvâ ngăn pơkeăng hiăng đi đo hnê tối, kuăn pơlê ối ulâi thế ối amê, kuăn pơlê hmâng ‘nâng, malối mâu kuăn ngo pêi pro tro, vâi ôh tá kơtâu hmuâ”.

Ngế ki lo ing mâu cheăm tơring kong pơlê ki ê troh a Čư Êlang athế tối tơbleăng tơná ăm khu ngăn pơkeăng

Tro tiô rơkong Ngế Phŏ pơkuâ hngêi pơkeăng cheăng Čư̆ Êlang tối, kuăn pơlê ‘nâi loi hiăng veăng kum cheăm plâ mơdât pơreăng châ tơ-ƀrê. Drêng hâi ai kơpong klâ krê tơchoâm, mâu ngế lo ing mâu kong pơlê ki ai pơreăng troh a Čư Êlang hiăng rak vế pêi pro tro tơdroăng klâ krê a hngêi. Drêng mâu pơlê cheăm  kong pơlê kơdroh prôk lăm, vâi krâ nhŏng o tung cheăm krếo phôn hơlêm tối dêi kuăn ‘nĕng pôi tá vêh, thế rak vế pêi pro tro tiô pơkâ klâ kơtăn pơlê pơla vâ pôi tá ai pơreăng tâ tú.

Ngoh Vàng Seo Pao, ối a kơpong pro pơlê nếo xô̆ 1, rơchôa Krông Pač thượng, cheăm Čư  Êlang, ăm ‘nâi:

Rak tơniăn a kơpong pro pơlê nếo kơxô̆ 1 a Čư Êlang

“Tâng vêh xuân thế lăm klâ kơtăn, a tíu ki mê xuân dế klâ ối kơtăn, tiô prế on veăng tơmiât mơhnhôk dêi kuăn ối amê hlối, xo ah hmôi hiăng tâi pơreăng ah prôk lăm pêi cheăng nếo. Hnê tối ăm dei kuăn ‘nĕng ối amê rak vế pêi pro tro tiô luât pơkâ, ôh tá chiâng prôk ulâi”.

Tiô pôa Trần Văn Thanh, Kăn xiâm hnê ngăn Vi ƀan cheăm Čư Êlang, tung 11 to thôn dêi cheăm, mê kơpong pro pơlê nếo kơxô̆ 1 ối xơpá má môi, xua mâu kuăn pơlê dế  lo ing kơpong long têa a cheăm Čư San (tơring M’Drak) vêh. Hbrâ mơdât pơreăng COVID-19 cheăm hiăng mơhnhôk mâu ngế amê, mơjiâng 10 tôh pơ’lêh dêi rơpó kum kuăn pơlê mơdâng pro hngêi, ing tơdroăng “Mâu ki troh hdrối kum mâu ki troh mơ’nui”. Tung lâp cheăm hiăng pơtối rak vế hnoăng cheăng dêi ngế kuăn pơlê rơtế ƀă mâu ngế cheăng ‘na pơkeăng pơlât, mâu lêng tung kuăn pơlê, kŏng an cheăm, séa ngăn mơdât ôh tá ăm mơngế mot lo, pêi pro tro tơdroăng tối tơbleăng tơná ăm mâu ki ngăn pơkeăng.

Tơdroăng ki môi tuăn dêi kuăn pơlê hiăng veăng kum Čư Êlang mơdât pơreăng COVID-19 ôh tá ăm mot tung cheăm, mơhé a tơdế 3 to cheăm ki dế ai pơreăng cho cheăm Vụ Bổn (tơring Krông Pač), cheăm Čư Pui (tơring Krông Bông) ƀă cheăm Čư Bông (tơring Ea Kar). Pôa Trần Văn Thanh tối nhên tâ:

“Krê achê ƀă cheăm Vụ Bổn mê nôkố ngin xuân dế pơtối rak vế 4 tíu séa ngăn, mê ai mâu khu rak ngăn thôn, mâu lêng kuăn pơlê ƀă kŏng an cheăm, thế mơdât mâu rơpŏng kuăn pơlê tung kơpong dế pêi pro tiô pơkâ 16 ôh tá chiâng prôk luâ mâu cheăm ki ai pơreăng. Ƀă kơpong achê cheăm Čư Bông mê ngin kô ai mâu tôh ki lă prôk ukô umê. Lâp tung cheăm ai 50 khu tơplâ COVID cheăng tung kuăn pơlê, rêm tôh pơkuâ séa ngăn ing 30 - 50 rơpŏng kuăn pơlê, ngăn tiô kơ pơ’leăng mâ mơngế tơrêm thôn. Klêi tí tăng ‘nâi plĕng dêi rêm tôh mê đi đo po tin nhăn tung khu zalo, pơtih tâng ai ngế ki lâi thế klâ krê mê mâu khu xuân ‘nâi, Khu rak ngăn thôn ăm ‘nâi, tâng châ ‘nâi vâi ôh tá rak  tro luât pơkâ lơ hlo vâi pro tơ ê hía tơdrêng mê ngin kô djâ mâu khu séa ngăn troh vâ mơnhên mơhé kơhâi lơ kơmăng”.

Tơkéa vâ tối, mâu tơdroăng pêi pro kơtăng dêi mâu kăn thôn pơlê, cheăm, tơring, ing tơdroăng vâ tơrŭm môi tuăn dêi kuăn pơlê mâu kuăn pơlê hdroâng kuăn ngo, cheăm Čư Êlang, tơring Ea Kar, kong pơlê Dak Lak dế rak tơniăn kơpong ki “hâi tâ pơreăng” ki ối tơdế kơpong hiăng tâ pơreăng COVID-19, kum kuăn pơlê hmiân tuăn pêi cheăng kâ rêh ối.

Gương tơplôu ƀă tơbleăng