VOV4.Sêdang - Klêi kơ’nâi tơring Dak Rlâp, kong pơlê Dak Nông pêi pro klâ kơtăn pơlê pơla tiô 16 a hâi lơ 7/9 ƀă troăng pêi ‘’kơbố ối ulâi mê ối môi tíu amê’’ vâ hbrâ, mơdât pơreăng, Khu pơkuâ vâi kơdrâi tơring hiăng pêi pro túa pêi ‘’ship 0 liăn’’ lăm kơchơ kum kuăn pơlê. Pơtối mê, a 11 cheăm, pơlê kân, Khu pơkuâ vâi kơdrâi tơring hiăng mơjiâng 110 khu lăm kơchơ 0 liăn ƀă veăng amê ai vâ chê 700 ngế a mâu thôn, pơlê, tôh kơphô̆.

Droh rơtăm lăm kơchơ kum kuăn pơlê

Rêm hâi, mâu khu ‘’ship 0 liăn’’ kô tơdah mơ-éa chêh rôe tơmeăm kum mâu rơpŏng. Drêng pơcháu mâu tơmeăm mê mâu ngế ki pơto ăm tơmeăm ôh tá trâm mâ ối achê mê ‘măn a bo cheăng hngêi ăm vâi krâ nhŏng o vâ tơniăn pơkâ hbrâ mơdât pơreăng. Túa pêi kố kô châ Khu pơkuâ vâi kơdrâi tơring Dak Rlâp rak tung pơla klâ kơtăn pơlê pơla tiô pơkâ 16.

A Sa Ly tơplôu ƀă tơbleăng