VOV4.Sêdang - Vâ tŏng kum teăm tơdrêng ăm kuăn pơlê tung kơpong klâ kơtăn, ki rơhêng vâ tối cho mâu rơpŏng kơtiê, rơpŏng hdroâng kuăn ngo, rơpŏng ai tơdroăng rêh ối pá puât tơring Dak Rlâp, kong pơlê Dak Nông hiăng mơhnhôk vâi krâ veăng tơlo châ lối hrĭng tâ̆n phái, tơmeăm kâ ƀă kơchâi plâi pôm. Pơtối mê, sap hâi lơ 7/9 troh nôkố, tơring Dak Rlâp hiăng mơhnhôk lối 55 tâ̆n phái, 66 tâ̆n kơchâi plâi pôm, vâ chê 1.300 kơxuô tơmeăm ƀă lối 300 rơtuh liăn a ngâ tŏng kum kuăn pơlê hbrâ mơdât COVID-19.

Pakĭng mê, tŏng kum ăm kuăn pơlê kơpong klâ kơtăn, kâng kơxái ôh tá ăm kuăn pơlê mot lo pakong, tơring hiăng xing xoăng phái, kơchâi drêh, plâi pôm troh mâu kơpong klâ kơtăn tơkŭm tung tơring. Cho tơring apoăng a Dak Nông pêi pro klâ kơtăn – kâng kơxái mơdât ôh tá ăm lo pakong vâ mơdât COVID-19, pôa Phạm Văn Hải, pôu râng hnoăng Kăn hnê ngăn Vi ƀan cheăm Quảng Tín, tơring Dak Rlâp tối ăm ‘nâi, ƀă tơdroăng môi tuăn, tơdjuôm ivá dêi mâu kơ koan, tíu cheăng ƀă kuăn pơlê, mâu rơpŏng ƀă ngế krê a kơpong klâ kơtăn, kâng kơxái mơdât ôh tá ăm mot lo tung kơpong klâ kơtăn, hiăng ai tŭm phái, kế kâ.

2 tíu ki pơreăng COVID-19 xông tâ tú ó cho ƀon Bu Bir ƀă Bu Dzách, troh nôkố hiăng châ mơdât pơreăng ƀă roh rêh ối dêi kuăn pơlê hiăng vêh tơniăn lĕm.

A Sa Ly tơplôu ƀă tơbleăng