VOV4.Sêdang - Trâm pá khât tung rak tơniăn vâ tăng cheăng pêi ăm rơpâu ngế kuăn pơlê vêh ing mâu kong pơlê peăng Hdroh tơnêi têa klêi kơ’nâi pơreăng COVID-19, tơring Krông Ƀuk, kong pơlê Dak Lak dế mơjiâng troăng tơtro vâ tăng cheăng pêi a ngiâ xuân môi tiah mâu troăng pêi ki ton xŏn vâ tŏng kum tăng cheăng pêi ăm kuăn pơlê drêng vêh a pơlê xiâm tơná.

Tâi hâi klâ kơtăn klêi vêh a pơlê ƀă rơxế honđa, ngoh Y Ngọc Niê, ối a ƀuôn Ktơng Drun, cheăm Čư̆ Né, tơring Krông Ƀuk dế tăng cheăng pêi ki tơtro a tơring. Y Ngọc Niê ăm ‘nâi, hdrối nah ngoh lăm pro kŏng nhân tung kŏng ti a pơlê krâm Biển Cát, kong pơlê Bình Dương. Xua pơreăng COVID-19 tâ tú rơ-iô, kơ’nâi hên khế ‘’kreăng” ối a Bình Dương drêng kong pơlê kố pơkâ kơtăng tơdroăng hbrâ mơdât pơreăng, mơhé hiăng châ pâk 2 trum vaccine la tơdroăng cheăng pêi ai drêng ai, drêng ôh, la lâi xuân xâu tơlêi tâ tú pơreăng, kơxô̆ liăn ‘măn kơdĭng hiăng tâi, ngoh Y Ngọc mơ-eăm vêh dêi a pơlê vâ ví pơreăng ƀă tăng cheăng pêi achê hngêi:

“A dế tơmiât vâ tăng cheăng pêi ki tơniăn tâ mê kô tăng môi tơdroăng cheăng ki tơtro. Xua hâk vâ vê rơxế ƀă xuân ai ƀâng vê rơxế há mê drêng pơreăng hiăng chía kơdroh ah á kô lăm tăng cheăng pêi a môi kŏng ti lơ a môi khu mơdró ki lâi ‘lo vâ pâ vê rơxế. Ki hdrối á ối a hngêi ‘nôi veăng pêi klâng chiâk, xuân hbrâ vâ troh rơnó krí kơphế mê á lăm krí kơphế vâi vâ tăng tơ’mot kơxô̆ liăn”.

Sap khế 5 troh nôkố, tơring Krông Ƀuk hiăng tơdah dâng 6.000 ngế kŏng nhân vêh ing mâu kong pơlê peăng Hdroh

Xua tơdroăng rêh ối rơpŏng hngêi xơpá, ôh tá ai tŭm tơnêi pê kâ mê kơtăn kố vâ chê 2 hơnăm, ngoh Lương Văn Hữu, ối a ƀuôn Mtâo, cheăm Ea Sin, tơring Krông Ƀuk lăm pêi cheăng pro kŏng nhân a Bình Dương. Sap ing mơ’nui khế 5, ai pơreăng tâ tú rơ-iô a mâu kong pơlê peăng Hdroh, kŏng ti kơdroh kơxô̆ mơngế pêi cheăng, ngoh thế chêh a pơlê vâ ví pơreăng. Tung pơla tơkôm tăng cheăng pêi, ngoh Hữu hiăng chêh inâi veăng pleăng tơná ƀă khu Đoân Droh rơtăm veăng kum ’na tơdroăng plâ mơdât pơreăng a kong pơlê.

“Á vêh a hlo vâi lăm pêi tơdroăng tŏng kum mê pá ‘nâng, á ối a hngêi kong mêi khía ti kô xuân ôh tá chiâng pêi ki klâi veăng há, chiâng kum ki lâi kum ki mê. A púi vâ pơreăng rĕng kâi mơdât vâ tơdroăng rêh ối vêh tơniăn môi tiah hdrối nah nếo”.

Tiô pôa Hoàng Kiên Cường, Kăn xiâm hnê ngăn Vi ƀan tơring Krông Ƀuk, kong pơlê Dak Lak, ing khế 5 troh nôkố, tơring hiăng tơdah dâng 6.000 ngế kuăn pơlê vêh ing mâu kong pơlê Bình Dương, Đồng Nai ƀă Pơlê kong kân Hồ Chí Minh, tâi tâng to mâu ngế dế tro hơnăm pêi cheăng kâ. Klêi tơdah mâu kŏng nhân vêh, tơring hiăng pêi pro mâu tơdroăng khăm ngăn vâ ‘nâi, klâ xoăng ối tiô pơkâ vâ tơniăn ‘na hbrâ mơdât pơreăng.

Nôkố, lâp tung tơring ai vâ chê 19 rơpâu 800 ha kơphế hiăng vâ troh rơnó krí, ƀă tâng riân châ dâng 44 rơpâu 200 tâ̆n kơphế kloăng. Ing mê, kal thế ai dâng 800 rơpâu ngế krí, tơ’mô vâ chê 27 rơpâu ngế cheăng krí tung pơla 30 hâi. Mâu hơnăm hdrối, rêm hơnăm tơring thế mơhnhôk lối 6 rơpâu 600 ngế kŏng nhân lo ing mau kong pơlê ki ê vâ lăm krí kơphế. Hơnăm kố, xua pơreăng tâ tú rơ-iô mê kơxô̆ mơngế ki mêi cheăng mê ôh tá châ krếo pêi tâi, teăng amê, tơring kô xúa mơngế ki pêi cheăng vêh ing mâu kong pơlê vâ hlối tơniăn ‘na krí kơphế hlối teăm rơnó gá, hlối châ pơkâ cheăng pêi ƀă hlối ai liăn ăm kuăn pơlê. Pôa Hoàng Kiên Cường tối: 

“Ki hdrối ƀă rơnó krí kơphế la ngiâ mê mơni mơngế pêi cheăng kô ôh tá ai hên ƀă xuân hiăng tơ’nôm mơngế ki pêi cheăng a mâu kong pơlê peăng hdroh mê kô xuân cho ki vâ kum mâu ngế ai cheăng pêi ahdrối. ‘Na ki ton ta ah klêi tơniăn, hiăng kâi mơdât pơreăng ah xuân pơtối mơdêk tơdroăng hnê hriâm, hnê cheăng pêi vâ kum ăm mâu ngế ki dế tro hơnăm pêi cheăng ai cheăng pêi; krếo mâu khu mơdró ‘no liăn cheăng pro ti lâi vâ mâu khu mơdró troh mê hlối veăng kum cheăng pêi ăm mâu kŏng nhân tung tơring, malối mâu kŏng nhân ki vêh ing mâu kong pơlê peăng Hdroh”.

Tiô tối hdrối rơnó krí kơphế hơnăm kố, tơring Krông Ƀuk kô kal dâng 27 rơpâu ngế pêi cheăng krí kơphế tung pơla 30 hâi

Tiô riân ngăn dêi khu xiâm ngăn cheăng pêi - mô đô̆i rong - ƀă pơlê pơla kong pơlê Dak Lak, sap khế 7/2021 troh nôkố, lâp tung kong pơlê ai lối 75 rơpâu ngế kŏng nhân ing mâu kong pơlê ki ê vêh. Krê sap apoăng khế 10 troh nôkố, ai vâ chê 26 rơpâu ngế. Tung mê, ki hên cho kŏng nhân dế pêi cheăng a mâu kơpong hngêi kơmăi a kong pơlê Bình Dương, Đồng Nai, Pơlê kong kân Hồ Chí Minh.

Vâ kum khu ki mê, Khu ngăn cheăng pêi hiăng tơpui ƀă mâu tơring kong pơlê ki kal tăng mơngế pêi cheăng vâ tơdjêp tăng tíu pêi cheăng drêng mâu hngêi kơmăi vêh pêi cheăng a nếo kêi hiăng tâi pơreăng. Krê ƀă mâu ngế pêi cheăng ki púi vâ pêi cheăng dêi a pơlê, Khu xiâm ngăn cheăng pêi  xuân pâ thế ƀơrô ngăn cheăng pêi dêi mâu tơring, pơlê krâ, pơlê kong kơdrâm tơkŭm inâu vâ mơjâng troăng rơhlâ tŏng kum ăm tơtro.

VOV Tây Nguyên

Gương tơplôu ƀă tơbleăng