VOV4.Xơ Đăng - Kơxo lơ 10/12, a Hngêi pơkeăng Kuân y 175, Khu xiâm pơkuâ tơdroăng loi tĭng tiô khôp, Hlá tơbeăng Điê̆n tưh Đảng Kŏng san Việt Nam tơrŭm tơkŭm po Hneăng hôp tơpui tơno khoa hok ‘’30 hơnăm tơrŭm khu ƀok thái pơkeăng kơvâ cheăng lêng kuăn pơlê a têa kơxĭ, rơlố’’ vâ mơnhên mâu tơdroăng ki pơxúa, mâu tơdroăng châ tơƀrê dêi tơdroăng pêi cheăng kố tung 30 hơnăm hiăng hluâ, xo vế túa ki rơkê tơtro ƀă pơkâ troăng vâ thăm mơnhông tơdroăng cheăng kố tung la ngiâ.

Klêi kơ’nâi 30 hơnăm, Khu cheăng hiăng pêi pro tơtro tơdroăng rak ngăn ivá kuăn pơlê ƀă mô đô̆i a drô tơkăng kong, rơlố; thăm pro ăm i dâi lĕm hngêi pơkeăng 972 cheăm, tung mê ai 597 cheăm ối tung kơpong hơngế, hơngo, kơpong tơkăng kong, rơlố. Ki rơhêng vâ tối cho mơjiâng châ tơƀrê 5 troăng pêi ƀă tơdroăng cheăng ki ê pơla tíu xiâm khăm pơlât tơring ƀă tôh khu ƀok thái pơkeăng kơvâ cheăng lêng ối tung Khu hnê mơhno cheăng lêng tơring.

Lối 40 ƀai chêh tơpui leăng a hneăng hôp hiăng mơnhên ‘na tơdroăng kal kí dêi tơdroăng tơrŭm pơla khu ƀok thái pơkeăng kơvâ cheăng lêng a têa kơxĭ, rơlố; mơnhên kố cho troăng hơlâ ki tơtro má môi dêi Đảng, Tơnêi têa, ôh tá xê to kum rak ngăn ƀă mơdêk ivá ăm kuăn pơlê, mô đô̆i mê ối ai pơxúa trâu hơngế ƀă tơdroăng pơtâng tối kuăn pơlê, thăm pro krá tơniăn tâi tâng kuăn pơlê veăng gak kring vâ vế ngăn tâi tâng tơnêi tơníu, hnoăng pơkuâ tơnêi têa.

A Sa Ly tơplôu ƀă tơbleăng