VOV4.Xơ Đăng - Kơxê lơ 10/12, a Hà Nội, Khu xiâm ngăn ‘na chiâk deăng ƀă Mơnhông thôn pơlê tơrŭm ƀă “Tơdroăng ki hơ’lêh nếo rơkê plĕng pêi chiâk deăng kân má môi lâp plâi tơnêi” CGIAR rơtế tơkŭm po rôh hôp ‘no tơdrêng ing troăng hyôh Internet tơpui ‘na mâu troăng hơlâ mơdêk tơrŭm cheăng pêi pro troh mơnhông pêi chiâk deăng krá ton a Việt Nam. Tơpui a Rôh hôp, pôa Lê Quốc Doanh, Ngế pro xiâm phŏ ngăn chiâk deăng ƀă Mơnhông thôn pơlê tối nhên, Việt Nam hiăng pêi châ tơdroăng ki mơdêk ki rơkê tung mâu hơnăm hdrối nah, malối cho tung kơvâ mơnhông mơdêk pêi chiâk deăng.

Hơnăm 2020, maluâ tro tơdjâk xua pơreăng kân COVID-19 la tê kế tơmeăm ngi kong têa ê môi tiah kế tơmeăm pêi lo ing chiâk deăng, loăng pơlái, ká xi xŏng xuân ối châ 41 rơtal dollars Mih. Krê khế 11 kố nah, tê tơmeăm pêi lo ing chiâk deăng, ká xi xŏng châ lối 43 rơtal dollars Mih, tâk troh 14% tâng vâ pơchông ƀă khế kố hơnăm nah ƀă tiô tối hdrối kô mơni tơkâ luâ tơdroăng pơkâ plâ hơnăm.

Vâ pơtối mot tung hneăng mơnhông nếo ƀă tơdroăng ki hên xơpá ƀă pơloăng mơnúa, Khu xiâm ngăn chiâk deăng ƀă mơnhông thôn pơlê rơhêng vâ pơtối châ xo tơdroăng ki tŏng kum dêi mâu khu ki ‘no liăn cheăng kong têa ê, malối cho mâu khu tơrŭm hriăn ngăn tơdroăng ki pêi chiâk deăng dêi CGIAR.

Katarina Nga tơplôu ƀă tơbleăng