VOV4.Sêdang - Kơxo lơ 29/10, a Hà Nội, po tơdroăng trâm mâ mơ’no tơdrêng tung um tiô troăng măng internet tơrŭm cheăng pơla droh rơtăm Việt Nam - Sinuâ hơnăm 2021. Veăng trâm mâ ai Kăn teăng mâ Tíu xiâm Đoân Droh rơtăm Kŏng sản Hồ Chí Minh, Tíu xiâm Đoân droh rơtăm kŏng sản Sinuâ ƀă lối 90 ngế kăn ngăn khu droh rơtăm, mâu sinh viên, mâu khu tơpui kâ hơnăm ối nếo ki rơkê dêi 2 tơnêi têa.

Tơdroăng amê vâ mơdêk ăm châ trâm tơpui tơno, hlê plĕng dêi rơpó, veăng kum hnê hriâm ăm mâu droh rơtăm 2 tơnêi têa ‘na tơrŭm tơrôa tiô hmâ sap nah pơla Việt Nam - Sinuâ; mơhno ki mơ-eăm, hnoăng cheăng pêi pro ƀă ki pơtối rak vế hnoăng mơ-eăm dêi hơnăm ối nếo 2 tơnêi têa tung tơdroăng pơtối, thăm tơrŭm pơla péa tơnêi têa.

Tung tơdroăng, mâu kăn ngăn khu droh rơtăm kơhnâ rơkê Việt Nam - Sinuâ hiăng tơpui tối ăm dêi rơpó ‘na tơdroăng cheăng Đoân droh rơtăm ƀă tơdroăng mơhnhôk mâu vâi o, malối tung veăng tơplâ mơdât pơreăng COVID-19 a tơrêm to kong têa; tơdroăng ki kal ăm mâu droh rơtăm tung tơdroăng tơrŭm lâp plâi tơnêi nôkố.

Gương tơplôu ƀă tơbleăng