VOV4.Sêdang - Kơxo lơ 29/10, a Hà Nội, Khu xiâm ngăn tơdroăng pơkâ ƀă ‘no liăn cheăng hiăng tơkŭm po “hneăng hôp tơbleăng troăng rơhlâ tơnêi têa ‘na mơdêk ngiât lĕm pơla hơnăm 2021-2030, ƀă tơdroăng vâ pêi troh hơnăm 2050”. Veăng hôp ai mâu kăn teăng mâ, Khu xiâm, kơvâ cheăng, kong pơlê, kăn teăng mâ mâu tíu pêi cheăng, mâu khu tơrŭm cheăng lâp plâi tơnêi, khu tơrŭm cheăng mơnhông tơ-ƀrê, teăng mâ mâu khu mơdró, mâu ngế rơkê tung mâu tơdroăng, mâu ngế rơkê tí tăng hriăn plĕng tơdroăng ki nếo.

Tơdroăng mơdêk pro ngiât lĕm pơkâ pŭn tơdroăng ki kal, mê cho: Kơdroh ‘no hyôh ‘mêi ing hngêi nhĕng. Lĕm mâu kơvâ cheăng kâ; lĕm ‘na tơdroăng rêh ối ƀă mơdêk xuá tơmeăm krá tơniăn ƀă ngiât lĕm tung pơ’lêh. Malối, pơkâ ki apoăng cho kơdroh ki mơ’no hyôh ing hngêi nhĕng ing GDP, veăng pêi pro tơpéa tơdroăng kring vế hyôh kong prâi hlối tơrŭm krá ƀă mơnhông mơdêk “Rĕng, krá tơniăn ton”. Troăng rơhlâ pơkâ hdró troh hơnăm 2030, ki mơ’no hyôh ing hngêi nhĕng kơpêng GDP kơdroh ki iâ 15% tâng vâ pơchông ƀă hơnăm 2014, hơngế tâ hơnăm 2025, ki mơ’no hyôh ‘mêi ing hngêi nhĕng kơpêng GDP kơdroh ki iâ má môi 30% tâng vâ pơchông ƀă hơnăm 2014.

Gương tơplôu ƀă tơbleăng