VOV4.Sêdang - Hâi lơ 27/10, Kuô̆k hô̆i tơpui tơno ‘no tơdrêng ing troăng hyôh internet ’na kơxop hlá mơéa pơkâ ƀă mâu tơdroăng, troăng hơlâ tŏng kum mơnhông dêi 4 to kong pơlê, mê cho pơlê kong kân Hải Phòng, kong pơlê Nghệ An, Thánh Hóa ƀă Thừa Thiên Huế. A hang lơng Kuô̆k hô̆i, ai mâu kăn tối tiah kố, tơbleăng troăng hơlâ ki xiâm vâ mơdêk cheăng kâ kong pơlê cho tơtro, la athế rak tơniăn tơnêi kong, tơnêi klâng.

Ai mâu kăn tối nhên, tơdroăng ki rak vế châ tơnêi kong hiăng pro chiâng tơdroăng ki ôh tá tơniăn, tơdjâk troh tơdroăng ki mơnhông cheăng kâ krá tơniăn, malối cho tung tơdroăng ki tối tơbleăng ‘na kong prâi tơnêi tíu môi tiah nôkố. xua mê, tơdroăng pơkâ xiâm ‘na rak ngăn tơnêi ƀă hơ’lêh tơdroăng ki xúa tơnêi, malối cho tơnêi kong, veăng kum pro hơ’lêh hlá mơ-éa chêh pro hlá mơéa, tơ’lêi hlâu ăm mâu kong pơlê tung tơdroăng ki kal athế hơ’lêh tơdroăng ki rơhêng vâ xúa tơnêi. La tơdroăng ki hơ’lêh athế rak tơniăn tơtro ƀă pro ai pơxúa tơƀrê, malối cho rak vế kong prâi tơnêi tíu ƀă mơnhông krá tơniăn.

Katarina Nga tơplôu ƀă tơbleăng