Luât tơnêi tơniú ki ‘mâi hơ’lêh pơkâ nhên mâu rơpŏng ki châ tơnêi têa xo tơvêh tơnêi vâ mơnhông cheăng kâ rêh ối pơlê pơla xua ki pơxúa dêi tơnêi têa, dêi pơlê pơla ƀă hên tơdroăng ki nếo, rak tơniăn krê, tro, tơdâng tơ’mô, tơbleăng tơdrăng, teăm tơdrêng ƀă tro pơkâ dêi luât. Rơtế a mê cho mâu tơdroăng ki pêi pro chêl thiê̆n, tŏng kum, vêh pro tíu ối, xo tơvêh tơnêi rak tơniăn tơdroăng pơkâ ki ai tơdroăng veăng dêi kuăn pơlê a mâu hneăng, rak tơniăn tơdroăng pơkâ ngế ki ai tơnêi tro xo tơvêh châ chêl thiê̆n, vêh pro pơlê hdrối vâ xo tơvêh.

Ƀă tơdroăng ki xo tơvêh tơnêi vâ mơjiâng bro tơdroăng tơkêa hngêi ối, Luât Tơnêi têa chiâng vâ xo tơvêh tơnêi vâ pro mâu tơdroăng tơkêa hngêi ối, tơdroăng tơkêa ki hên tơdroăng ‘na hngêi ối ƀă tê mơdró, tơdroăng tê mơdró bu tung mâu tơdroăng tơkêa ‘no liăn mơjiâng bro kơpong kơphô̆. Drêng xo tơvêh tơnêi kố athế pêi pro châ tiô mâu tơdroăng ki séa ngăn, mâu tơdroăng tiô pơkâ. Pơkâ kố cho hvêa chêng prôk ki kal, vâ rak vế hnoăng pơkuâ dêi kuăn plê ƀă ví tơdroăng ki pro pơxúa ăm dêi tơná ing tơdroăng ki xo tơvêh tơnêi. Trần Nhung, a Long Biên, Hà Nội tối tiah kố:

“Ngin phiu ro khât drêng Kuô̆k hô̆i hiăng teăm ‘mâi rơnêu, ‘mot tơ’nôm Luât tơnêi tơníu hiăng pơkâ ƀă ai hên tơdroăng ki tơƀrê, xua ki pơxúa dêi kuăn pơlê. Rơhêng vâ luât Tơnêi tơníu nếo châ pêi pro. Tâng Tơnêi têa pro mâu kế tơmeăm tơdjuôm pơxúa ăm pơlê pơla, gâk kring pơlê pơla cheăm bêng ngin kô môi tuăn khât. Tâng kơpong tơnêi châ xo tơvêh vâ pro hngêi ối ngin xuân môi tuăn, la tê mơdró mê athế pơkâ tơleăng tiô yă kơchơ tê mơdró roê, tê”.

Luât tơnêi tơníu ki ‘mâi hơ’lêh ai hên tơdroăng châ ‘mâi rơnêu tiô troăng rak vế pơxúa khât ăm kuăn pơlê. Tiah mê, mâu ngế ki châ rak xúa tơnêi ối tung rơpŏng ki athế tro xo tơvêh kô châ xúa kơlo chêl thiê̆n tro ƀă kơchơ tê mơdró roê tê. Hoàng Văn Cường, ngế ki lo ing pơlê kong kân Hà Nội tối leăng:

“Luât tơnêi tơníu ki ‘mâi hơ’lêh tơmiât troh tơdroăng ki athế rak vế châ hnoăng pơxúa ăm kuăn pơlê tro tâ. Môi tiah drêng xo tơvêh tơnêi mê yă tơnêi vâ chêl thiê̆n châ mơnhên ƀă, lơ iâ tâ lơ vâ ƀă yă tê dêi kơchơ mơdró tê roê lơ iâ tâ nếo athế tơ’mô ƀă yă ki Tơnêi têa pơkâ. Mơ-éa tơbleăng yă cho tơdroăng ki tơbleăng yă hiăng châ tơbleăng rêm hơnăm, châ rơnêu rêm hơnăm ƀă xuân athế châ xúa ƀă yă kơchơ tê roê. Tiah mê kô ôh tá ai tơdroăng ki yă chêl thiê̆n iâ tâ tâng pơchông ƀă kơdró roê tê môi tiah hdrối”.

Tiô luât ki nếo, tơdroăng ki châ xúa tơnêi tơníu kô châ ‘mâi rơnêu tiô troăng ki tơbleăng tơdroăng, rôh ki tơ’lêi cho tơdâng tơ’mô ăm tâi tâng rêm ngế. Ing mâu túa pơkâ ki tơbriât tê roê kô kum ăm mâu khu mơdró kâ ki rơkê plĕng, ivá cheăng tơƀrê sap ing ton nah rôh ki xúa tơnêi, tơƀrê. Troăng hơlâ nếo kô kơdroh hên mâu tơrŭm pâ – ăm. Pôa Lê Hoàng Châu, Kăn hnê ngăn Khu tơrŭm tê mơdró hngêi trăng, tơnêi tơníu Pơlê kong kân Hồ Chí Minh mơnhên tối:

“Ngin mơnhên tối khât troăng hơlâ kố. Tâng châ pêi pro tiô túa ki tŭm, kơtăng kô pro ai tơdroăng ki môi tuăn tung pơlê pơla ƀă rak vế châ hnoăng ki pơxúa tro luât. Má môi cho dêi ngế ki ai tơnêi tro xo tơvêh. Má péa cho rak vế hnoăng pơxúa tro luât dêi khu ki ‘no liăn. Má pái, Tơnêi têa xo tơvêh mâu tơnêi tơníu ôh tá tơdrăng ƀă kum pơxúa ăm plê pơla”.

Luât tơnêi tơníu ki ‘mâi hơ’lêh châ tơbleăng kô rak tơniăn troăng hơlâ pơkâ yă tơnêi tiô tro kơchơ tê roê; rak tơniăn hnoăng ki xúa tơnêi tơníu tiô túa ki tơdâng tơ’mô, xuân môi tiah mâu hnoăng rak xúa kế tơmeăm ‘na tơnêi tơníu dêi kuăn pơlê, khu mơdró kâ châ rak vế. Ing mê, pơxiâm po ăm tơdroăng ki liăn ngân, kế tơmeăm tơnêi ăm tơdroăng mơnhông mơdêk dêi tơnêi têa.