Đồng Nai Thượng cho cheăm ki má môi dêi tơring Cát Tiên, châ lối 440 rơpŏng, pơ’leăng mơngế ai 1.800, tung mê kơxô̆ kuăn pơlê hdroâng kuăn ngo châ troh 95%. Pakĭng tơdah xo rak ngăn kong, pêi chiâk deăng cho kơxô̆ liăn pêi lo xiâm dêi kuăn pơlê a tíu kố. Laga, tiô pôa K’Minh, a thôn Dà Cọ, cheăm Đồng Nai Thượng, xua kong tô mơdrăng khăng khoăng, ôh tá ai têa tôh pro mâu ƀăng tơnêi pêt tơmeăm tro khăng hlâ, chiâng tro lŭp ó.

“Chal krâ hmâ ai rơkong tối “má môi cho têa, má péa cho phon, má pái cho kơhnâ, má pŭn cho hơdrê”, xua mê tâng ôh ti ai têa mê vâi krâ nhŏng o ôh tá chiâng pêi klâi ôh. Đồng Nai Thượng cho kơpong hngế, kơpong ki hmâ châ Đảng, Tơnêi têa tơmâng ngăn tŏng kum troh vâi krâ nhŏng o ngin, xua ôh tá ai têa loăng plâi sầu rêng nôkố hiăng hlâ, tơruih plâi mê kal khât ai têa rế rĕng rế ‘ló vâ kum ăm kuăn pơlê tôh dêi tơmeăm pêt”.

Mâu hơnăm hdrối nah, kuăn pơlê Đồng Nai Thượng hiăng hơ’lêh mâu hdrê loăng pêt, ăm lối 100 ha kloăng hôt ki hiăng krâ, ôh tá ai plâi xếo chiâng pêt mâu loăng plâi kâ, loăng pêt ton hơnăm môi tiah ƀơr, sầu riêng, kơphế, tiu ƀă hên ki ê pro pơxúa ‘na liăn ngân hên. Malối, kuăn pơlê hiăng mơjiang ƀlêi chiâng mah kơxô̆ kơpong pêt sầu riêng vâ tê ngi kong têa ê ƀă ƀăng tơnêi lối 120 ha; tiu ai inâi Tiêu sọ Đồng Nai Thượng xuân châ tiô pơkâ OCOP 3 hơlŏng râ kong pơlê. Kố cho mâu tơmeăm pêi lo ing chiâk deăng ki xiâm, kum Đồng Nai Thượng ai ivá vâ mơ-eăm hluăn ing kơtiê, mơjiâng pơlê cheăm mơnhông. Laga, tơdroăng ki ôh tá ai têa tôh hiăng tơdjâk hên troh ki lĕm tung pêt tơmeăm ƀă tơdroăng rêh ối dêi kuăn pơlê a tíu kố.

 Pôa Nguyễn Văn Quy, a thôn Bù Sa, cheăm Đồng Nai Thượng, ăm ‘nâi, nôkố mâu rơchoâ têa a cheăm tơring gá bu kŭn luâ râ, tung pơla tơmeăm pêt kal châ tôh têa rế hía rế hên cho xiâm kối pro lối hrĭng ha dế mơni kô tro răng hlâ a rơnó tôu kố.

“Dà Rông ai 3 tíu ki ai têa la kong mê troh gá hiu lo a troăng Đồng Nai tâi. Tíu kố cho kơpong ngo ‘ngêi mê kong mê gá ai têa tâng ôh tá ai mêi gá kô xiâ tâi. Maluâ ai chiâ rơchoâ ki kŭn la têa xuân bú iâ xua ối ai têa mŏng. Á pơkâ thế kơdât rơchoâ kố vâ rak têa ƀă pro têa mŏng ăm kuăn pơlê tâi tâng kơpong kố vâ tôh ăm dêi mâu hdrê loăng pêt”.

A rôh trâm mâ kuăn pơlê, Khu kăn Kuô̆k hô̆i hiăng tơmâng xo rơkong tơpui tối dêi kuăn pơlê ƀă pơkâ thế mâu kơ koan ki ai tơdjâk troh kong pơlê Lâm Đồng tơmâng ngăn troh hnoăng cheăng tăng têa vâ tôh ăm kế tơmeăm pêt tung rơnó tô mơdrăng khăng khoăng, ai túa pơkâ rak bê tŭm têa tôh tơniăn ton ăm kuăn pơlê.