VOV4.Xơ Đăng - Ƀơrô Chin phuh nếo ăm pêi pro tơbleăng hâi lơ 7/11/2021 mơgêi dêi pôa Vũ Đức Đam, Ngế pro xiâm phŏ hnê ngăn tơnêi têa, a roh hôp mơ’no tơdrêng tung um tiô troăng măng internet ƀă mâu kong pơlê peăng mâ hâi luô pá Hdroh tơnêi têa ƀă Tây Nguyên ‘na tơdroăng hbrâ mơdât COVID-19.

Klêi kơ’nâi tơmâng tơbleăng dêi mâu kong pơlê, rơkong tơpui dêi kăn pơkuâ Khu xiâm ngăn pơkeăng ƀă khăm pơlât, Khu xiâm Kŏng an, Tôh pêi cheăng ki má môi dêi Chin phuh ƀă mâu kăn teăng mâ veăng hôp, pôa Vũ Đức Đam, Ngế pro xiâm phŏ hnê ngăn pơkâ Khu xiâm ngăn pơkeăng ƀă khăm pơlât thâ pêi pro tơdroăng xing xoăng, hnê mơhno tơkŭm po pâk vaccine a mâu kong pơlê kơpong peăng hdroh tơnêi têa ƀă Tây Nguyên, tơniăn pâk tâi tâng ăm kuăn pơlê trum má 1 tung pơla 5 hâi ăm mơngế lối 18 hơnăm; pâk trum má péa teăm tơdrêng, tŭm; pâk ăm vâi hdrêng  12 – 17 hơnăm.

Khu xiâm pơkuâ lêng tơkŭm ăm khu cheăng tŏng kum pâk rĕng má môi. Khu xiâm ngăn pơkeăng ƀă khăm pơlât hnê mơhno nhên, tơniăn kơxô̆ pơkeăng vâ pơlât rĕng sap ing apoăng mâu ngế F0 vâ kơdroh iâ má môi tơdroăng ki châi râ, hlâ mơngế.

A Sa Ly tơplôu ƀă tơbleăng