VOV4.Xơ Đăng - Mâu um tơvi, rơ’jiu ki kân dêi Nhuk ki mơ’no a hâi lơ 22/11 môi tiah  Mainichi, Nikkei, Jiji ƀă hên ki ê pơrá mơ’no tối ‘na rôh lăm pôu păng ‘nâng kong têa Nhuk dêi Ngế pro xiâm hnê ngăn Chin phuh tơnêi têa Kŏng hòa xah hô̆i chuh ngiah Việt Nam cho pôa Phạm Minh Chính pơxiâm sap ing hâi lơ 22 – 25/11. Hlá tơbeăng Mainichi tối nhên, pôa Phạm Minh Chính, Ngế pro xiâm hnê ngăn tơnêi têa cho tơmối ki apoăng lăm pôu păng ‘nâng kong têa Nhuk sap ing khu kăn pơkuâ dêi pôa Kishida Fumio, Ngế pro xiâm hnê ngăn kong têa pơxiâm po.

Rôh lăm pôu kố cho vâ mơhno tối tơrŭm cheăng pơla péa pâ a hên kơvâ cheăng môi tiah gak kring, cheăng kâ ƀă hên ki ê pêi pro troh tơdroăng ki pêi pro tung kơpong Ấn Độ - Thái Bình Dương tơniăn krê ƀă po rơdâ. Tung rôh lăm pôu kố, a hâi lơ 24/11, pôa Phạm Minh Chính kô ai rôh tơpui tơno ƀă pôa Kishida Fumio, tơpui ‘na tơdroăng ki trâm tung lâp plâi tơnêi, po rơdâ tơdroăng ki pơtroh mâu ngế thưk tâ̆p sinh Việt Nam pêi cheăng a Nhuk, tơdroăng kong têa ê, tung mê ai tơdroăng a kơpong Biển Đông ƀă Hoa Đông.

Katarina Nga tơplôu ƀă tơbleăng