VOV4.Xơ Đăng - Ăm rơkong veăng tơpui tối ‘na tơdroăng ki hbrâ ăm hneăng hôp ôh tá tối hdrối dêi Kuô̆k hô̆i hneăng má 15, Vi ƀan pơkuâ Kuô̆k hô̆i tối nhên athế rak tơniăn ki rơkê plĕng, rak tơniăn tơdroăng ki pơkâ thế ƀă pơkâ mơ’no mê nếo tơkŭm po rôh hôp hneăng. 4 tơdroăng kal tiô tối ki pơtroh ăm Kuô̆k hô̆i a hneăng hôp ki ôh tá tối hdrối mê cho: Kơxop hlá mơéa Luât ki ‘mâi rơnêu, ‘mot tơ’nôm mâu tơdroăng dêi mâu kơxop hlá mơéa luât; Kơxop hlá mơéa mơjiâng kế tơmeăm khoăng troăng prôk tơdrăng sap ing peăng kơnhŏng troh peăng hdroh peăng mâ hâi lo hneăng hơnăm 2021 -2025; Hlá mơ-éa pơtroh dêi Chin phuh ‘na troăng hơlâ liăn ngân vâ tŏng kum tơdrêng tung tơbleăng tơdroăng ‘mâi mơnhông ƀă mơdêk cheăng kâ rêh ối pơlê; Kơxop hlá mơ-éa pơkâ tíu mơjiâng pro kế tơmeăm, troăng hơlâ pơkâ xiâm mơnhông pơlê kong kân Cần Thơ.

Pôa Trần Văn Sơn, kăn xiâm pơkuâ Ƀơrô cheăng Chin phuh ăm ‘nâi: 4 tơdroăng ki xiâm nôkố hiăng tŭm ‘na troăng hơlâ vâ pơtroh ăm Kuô̆k hô̆i. A rôh hôp, pôa Vương Đình Huệ, kăn xiâm hnê ngăn Kuô̆k hô̆i pơkâ thế Chin phuh ƀă mâu kơ koan dêi Kuô̆k hô̆i tơrŭm vâ môi tuăn túa pơkâ. Drêng Vi ƀan pơkuâ Kuô̆k hô̆i ƀă Chin phuh môi tuăn, pơtroh ăm Kuô̆k hô̆i kô châ tơƀrê tơdroăng ki môi tuăn. Tơpui mơgêi rôh hôp rôh má 1 hâi pơtăm, kăn xiâm hnê ngăn Kuô̆k hô̆i ăm’nâi: Vi ƀan pơkuâ Kuô̆k hô̆i môi tuăn ƀă troăng hơlâ tơkŭm po hneăng hôp ôh tá tối hdrói dêi Kuô̆k hô̆i hneăng má 15, laga, athế rak tơniăn ki rơkê plĕng dêi mâu tơdroăng ki pơtroh ăm Kuô̆k hô̆i.

Katarina Nga tơplôu ƀă tơbleăng