VOV4.Xơ Đăng - Pơtối tơdroăng roh hôp má 6, kơxê lơ 9/12, Vi ƀan pơkuâ Kuô̆k hô̆i tơpui ‘na tơdroăng tơkêa bro mơjiâng troăng pơkâ pêi, troăng hơlâ pơkuâ liăn ngân vâ tŏng kum pêi pro Tơdroăng rak tơniăn ƀă mơnhông mơdêk cheăng kâ – rêh ối pơlê pơla. Tơdroăng tơkêa bro kố cho tơdroăng tơkêa bro ki kal ƀă thâ nôkố. Môi tơdroăng xiâm hdrối nah hiăng châ Kuô̆k hô̆i pơcháu hnoăng ăm Vi ƀan pơkuâ Kuô̆k hô̆i séa ngăn.

Roh kố Tơdroăng rak tơniăn ƀă mơnhông mơdêk cheăng kâ – rêh ối pơlê pơla ối pa kong troăng pơkâ pêi 5 hơnăm 2021 – 2025 hiăng châ Kuô̆k hô̆i tơbleăng ăm pêi pro môi tiah: pơkâ pêi mơnhông mơdêk  cheăng kâ – rêh ối pơlê pơla, pơkâ pơkuâ liăn ngân, pơkâ mơ’no liăn cheăng iâ khế, pơkâ mung liăn ƀă chêl liăn chê̆n iâ khế.

Tung pơla pơreăng ối xông tâ tú ó, tơdroăng ai kơxô̆ liăn tŏng kum pơtối vâ pro tơniăn cheăng kâ cho kal khât. Kơxô̆ liăn kum kố tơkŭm tung 2 hơnăm. Tung mê, hơnăm 2022 tơkŭm tung tơdroăng rak tơniăn, ƀă hơnăm 2023 kô tơkŭm tung tơdroăng mơhnhôk tơtêk. Kơxô̆ liăn vâ pêi pro kơxô̆ liăn tŏng kum, mơni ing tơdroăng ki mung ƀă ai ivá chêl chĕn, laga thế rak tơniăn ki chiâng pêi pro ƀă tơdroăng ki mot dêi tơdroăng cheăng kâ.

A Sa Ly tơplôu ƀă tơbleăng