VOV4.Sêdang - Pơtối Rôh hôp má 3 dêi Vi ƀan pơkuâ Kuô̆k hô̆i, hâi lơ 20/9, xua tơdroăng pơkuâ dêi pôa Vương Đình Huệ, ngế cheăng tung tíu xiâm kal kí, kăn xiâm hnê ngăn Kuô̆k hô̆i ăm rơkong veăng tơpui tối ‘na mâu hlá mơ-éa tối tơbleăng hnoăng cheăng hơnăm 2021 dêi khô̆i Luât. Tơpui a rôh hôp, Vi ƀan pơkuâ Kuô̆k hô̆i mơnhên tối, mâu hlá mơ-éa tối tơbleăng dêi Chin phuh, Hngêi tơleăng xiâm, Viê̆n arak luât châ hbrâ rơnáu nhên, trâu hơngế ƀă ai hên tơdroăng ki hơ’lêh nếo.

Laga, pơkâ thế mâu kơ koan kal pêi pro nhên tơ’nôm mâu troăng hơlâ vâ mơdêk mâu tơdroăng ki kal tung hnoăng cheăng hbrâ mơdât mâu ngế pro xôi, pro xôi luât ƀă hbrâ mơdât kâ kơluâ; tơdrêng amê hnối ‘mâi rơnêu mâu tơdroăng ki tá hâi pêi pro klêi, pêi pro nhên tơdroăng dế ai mâu rôh pro xôi luât nếo vâ ai troăng pơkâ tơleăng; kal pơtối pêi klêi troăng hơlâ, hơ’lêh nếo hnoăng cheăng pơkuâ, mơdêk hnoăng cheăng tơrŭm, tung mê, tơmâng ngăn troh mâu tơdroăng ki ‘mâi rơnêu, ‘mot tơ’nôm, pêi klêi troăng hơlâ, tơdroăng ki pâ thế ƀă Kuô̆k hô̆i, Vi ƀan pơkuâ Kuô̆k hô̆i.

Katarina Nga tơplôu ƀă tơbleăng