VOV4.Xơ Đăng - Pơtối tơdroăng roh hôp má 6, kơxo lơ 10/12, tơpui ‘na troăng hơlâ mơ’no liăn tơdroăng tơkêa bro mơjiâng troăng kân ăm phêp rơxế kơtâu têi peăng kơnhŏng – peăng hdroh pá mâ hâi lo hneăng hơnăm 2021 – 2025, Vi ƀan pơkuâ Kuô̆k hô̆i pơkâ thế tơmiât nhên ƀă mơnhên i nhên troăng mơ’no liăn tơdroăng tơkêa bro mơjiâng pro troăng kân ai 4 hơlâ troăng rơxế kơtâu 24,75 met tâng pơchông ƀă troăng kân ki ai 4 hơlâ troăng rơxế kơtâu ƀă 17 met vâ tơniăn châ tơƀrê tung tơdroăng ăm rơxế prôk lăm.

Vi ƀan pơkuâ Kuô̆k hô̆i môi tuăn tơbleăng Kuô̆k hô̆i séa ngăn pơkâ tơdroăng mơ’no liăn tâi tâng tơdroăng tơkêa bro kố ing kơxô̆ liăn tơnêi têa. Tơdrêng amê vêh pro tơniăn pơkâ mơ’no liăn cheăng iâ khế vâ xing xoăng kơxô̆ liăn tung pơkâ iâ khế pêi pro tơdroăng tơkêa bro troăng kân ăm phêp rơxế kơtâu têi peăng kơnhŏng – peăng Hdroh pá mâ hâi lo hneăng hơnăm 2024 – 2025.

Tơbleăng Kuô̆k hô̆i pôu râng hnoăng ăm Vi ƀan pơkuâ Kuô̆k hô̆i séa ngăn, pơkâ troăng hơlâ pơ’lêh xiâm kối xúa kong dêi tơdroăng tơkêa bro tung tơbleăng hriăn plĕng chiâng pêi pro.

Xuân tung hâi lơ 10/12, Vi ƀan pơkuâ Kuô̆k hô̆i hiăng tơpui ‘na tơdroăng hbrâ hneăng hôp ôh tá tối hdrối dêi Kuô̆k hô̆i hneăng má 15.

A Sa Ly tơplôu ƀă tơbleăng