VOV4.Xơ Đăng - Kơxo lơ 24/11 tiô chôu kong têa, a Tokyo, tung hneăng lăm pôu kong têa Nhuk, pôa Phạm Minh Chính, Ngế pro xiâm hnê ngăn tơnêi têa veăng trâm mâ, pêi cheăng ƀă mâu kăn dêi Grup ki kân dêi Nhuk tung tơdroăng hơ’lêh kơxô̆.  A rôh trâm mâ, pôa Phạm Minh Chính, Ngế pro xiâm hnê ngăn tơnêi têa ăm ‘nâi: pơla hdrối kố nah pơreăng kân COVID-19 hiăng mơdêk rơdêi hơ’lêh kơxô̆ a Việt Nam.

Tung 20 hơnăm, kơxô̆ kuăn pơlê xúa kơmăi kơmok tiô troăng hyôh Internet nếo châ 12%, la bú tung pái khế apoăng hơnăm COVID-19 hiăng ăm hlo, kơxô̆ ki mê tâk luâ 2 hdroh tâk 24%. Việt Nam ai 80% ngế hok tro, sinh viên hriâm tiô troăng hyôh internet, hên tâ tơdế dêi lâp plâi tơnêi lối 60%. Chin phuh Việt Nam hiăng ai hên luât pơkâ, tŏng kum mơnhông mơdêk kơxô̆ ki chêh ‘măn, châ tối ối tung top 50 kong têa ki rak kơxô̆ chêh ‘măn po a hơnăm 2025, top 30 a hơnăm 2030. Tơbleăng a rôh pêi cheăng, Ngế pro xiâm hnê ngăn tơnêi têa tối nhên, hơ’lêh kơxô̆ ôh tá xê to tơdroăng chông djâ dêi Chin phuh mê ối ai veăng dêi kuăn pơlê, khu mơdró, xo kuăn pơlê pro xiâm, tŭm tơdroăng pơkâ tŏng kum thế tơmiât troh kuăn pơlê ƀă khu mơdró, kuăn pơlê ƀă khu mơdró veăng tung tơdroăng hơ’lêh kơxô̆. ‘Na mâu tơdroăng ki nhên mê mâu kăn tơmâng, Ngế pro xiâm hnê ngăn tơnêi têa kô tối ‘na troăng rơhlâ dêi Việt Nam cho hơ’lêh nếo rĕng ‘na kơvâ liăn ngân vâ mâu kơvâ ki mê djâ troăng ahdrối tung hơ’lêh kơxô̆.

Gương tơplôu ƀă tơbleăng