VOV4.Sêdang - Xuân tung tơdroăng pêi cheăng a Mih, pôa Nguyễn Xuân Phúc, Kăn xiâm hnê ngăn tơnêi têa hiăng ai mơ-éa tơbleăng tối pơtroh Hneăng hôp kân dêi Khu lâp kong têa ‘na phái kâ, tơmeăm kâ xua pôa António Guteres, Kăn xiâm chêh tôm xo rơkong Khu lâp kong têa pơkuâ. Pôa Nguyễn Xuân Phúc hiăng pơkâ mâu troăng tơniăn kế kâ drêng kong prâi pro ôh tá tơniăn ƀă pơreăng COVID-19 ƀă tối ăm ‘nâi, Việt Nam vâ chiâng môi tíu xiâm tơmiât pêi rơkê ‘na phái, kế kâ a kơpong.

Tung ƀai xông tơpui, pôa Nguyễn Xuân Phúc tối nhên, tơrŭm pơla mâu kong têa, mâu khu tơrŭm cheăng, mơngế tung tơdroăng ‘na phái, kế kâ thế xua vâ pơxúa dêi kuăn pơlê. A Việt Nam, tơniăn phái, tơmeăm kâ cho xiâm kối xăm kơklêa kơdroh kơtiê, mơdêk tơdroăng rêh ối kuăn pơlê ƀă cho roh tơ’lêi vâ mơnhông pêi chiâk deăng Việt Nam tơdrăng, pôu râng dêi hnoăng cheăng, krá tơniăn.

Vâ mơnhông mơdêk krá tơniăn tơmeăm kâ, pôa Nguyễn Xuân Phúc tối, kal po rơdâ tơrŭm cheăng lâp plâi tơnêi tung hriăn plĕng, tối hdrối, mơjiâng tơdroăng tơbleăng tối ki ôh tá tơniăn ‘na kong prâi, pơreăng; pơkuâ krá tơniăn mâu tơmeăm khoăng tơnêi têa, hên hĭn sinh hok ƀă kong; Pơkuâ kơnhŏng têa tơkâ hluâ tơkăng kong, tơmeăm khoăng a têa kơxĭ.

A Sa Ly tơplôu ƀă tơbleăng