Hơp tak xăh Ea Tân, apŭng Krông Năng, dêh char Đắk Lắk đei 220 ŭnh hnam jang hơdai pơtăm cheh phe akŏp teh xă hloh 330 hec-ta. Ƀok Nguyễn Trí Thắng, Kơdră vei lăng Hơp tak xăh roi tơbăt, ‘meh hơtŏk kơjă mŭk drăm ‘noh athei jang hơdai pơm tơlĕch kiơ̆ tơdrong jang tih vă tơ jur jên tơmơ̆t jang blŭng, pơm đei tơmam ‘lơ̆ng dang ăi iŏk đei dôm hơgăt, hla ar pơkăp ‘lơ̆ng apŭng plĕnh teh:

“Kơjă iŏk răt ‘noh hơp tak xăh ling lang răt măk ƀiơ̆ hăm kơjă anih tĕch mơdro păng hơp tak xăh oei tơgŭm dôm bơngai jang hơdai găh ki thuơ̆t pơm tơlĕch păng hơp tak xăh răt iŏk dơ̆ng cheh phe ‘lơ̆ng ‘noh. Đơ̆ng rŏng 4-5 sơnăm ‘noh lơ bơngai jang lơ̆m hơp tak xăh hlôi tơplih ‘lơ̆ng đei mŭk drăm ŭnh hnam păng gĭt kăl hloh ‘noh jĭ sư sơđơ̆ng.”

Tŭn pran jang hơdai lơ̆m pơm tơlĕch, tĕch tơmam pơm đei dôm trong jang pơtruh tơmam sa rơgoh ‘lơ̆ng ‘noh jĭ trong vă kŏng ti răt tơmơ̆t tĕch tơlĕch tơ̆ teh đak đe 2-9 Đắk Lắk (Simexco DakLak) tŏk bŏk pơm tơiung dôm jơnei lơ̆m anih tĕch mơdro. Vang jang lơ̆m trong jang hơdai, kon pơlei đei anih mơdro sa tơmơ̆t jên jang ăn hơdrĕch, tơmam choh jang sa vă sơđơ̆ng pơm tơlĕch păng răt pơđĭ tơmam hăm kơjă sơđơ̆ng. Ƀok Lê Đức Huy, Kơdră dơnơm vei lăng Simexco Dak Lak roi tơbăt, gơnang đơ̆ng jang hơdai, anih mơdro sa kŭm kơchăng đei tơmam ‘lơ̆ng:

“Jang tơnăp păng đon hlôh vao đơ̆ng kon pơlei jang chŭn mir păng kon pơlei jang chŭn mir jing dôm bơngai jang hơdai. Kon pơlei jang chŭn mir jing dôm anih mơdro sa choh jang sa. Ƀơ̆t đei đon hlôh vao thoi noh kon pơlei jang chŭn mir bơ̆jang tôch kơ ‘lơ̆ng. ‘Noh jĭ tơdrong tôch kơ ‘lơ̆ng vă dôm kŏng ti hơnhăk tơmam đơ̆ng choh jang sa đơ̆ng bơ̆n tĕch tơ̆ apŭng plĕnh teh”.

Lơ̆m dêh char Đắk Lắk dang ei đei hloh 470 hơp tak xăh bơ̆jang lơ̆m tơdrong jang choh jang sa, lơ̆m noh, đei dang 150 hơp tak xăh vang jang hơdai pơm tơlĕch tơmam. Ƀok Huỳnh Bài, Kơdră Jơnŭm Hơp tak xăh dêh char Đắk Lắk ăn tơbăt: găh lơ dôm trong jang tŏk bŏk akŏm lơ̆m dôm tơmam tơm nhen cheh phe, tiu, phe ƀa, dôm kơloăi ‘long sa plei....Tơdrong jang hơdai hlôi ƀrư̆ ƀrư̆ hơmet ‘lơ̆ng tơdrong răh rai, iĕ le, hơnhăk pơm tơlĕch kiơ̆ trong akŏm, pơm lăp hăm ‘meh vă tĕch mơdro.

 “Ƀrư̆ ƀrư̆ gơh băt hăm trong jang âu vă pơtho hơp tak xăh kŭm nhen dôm ŭnh hnam kon pơlei jang hơdai hăm dôm anih mơdro sa 1 trong kơjăp vă vei lăng găh trong jang pơm tơlĕch kŭm nhen tơmam ‘lơ̆ng”.

Kiơ̆ kơ ƀok Nguyễn Hoài Dương, Kơdră Anih vei lăng Choh jang sa păng Hơtŏk tơiung Tơring tơrang dêh char Đắk Lắk, lơ̆m khei ‘năr kơjă tơmam choh jang sa ưh kơ đei pơdơh tơplih ‘noh tơdrong hơtŏk loi dơ̆ng jang hơdai lơ̆m pơm tơlĕch choh jang sa jing trong jang kăl. Anih choh jang sa tŏk bŏk krao hơvơn tơmơ̆t jên jang pơjing dôm trong jang hơdai lơ̆m pơm tơlĕch tĕch tơmam, mă loi ‘noh jĭ hăm dôm kơ loăi ‘long pơtăm tơm kơ dêh char.

“Hơtŏk tơiung dôm tơring pơm tơlĕch akŏm, hơtŏk đei yua tơmam ‘lơ̆ng kơ rim tơring vă pơtrŭt pơgơ̆r pơm tơlĕch kiơ̆ trong jang hơdai sơng đei lơ bơngai tơmơ̆t jên jang truh hăm dôm tơring choh jang sa tơring tơrang vă jang hơdai tĕch tơmam păng mă loi ‘noh jĭ pơtrŭt pơm tơlĕch tơmam đơ̆ng choh jang sa bri ‘long pơm đei kơjă tŏk păng tĕch tơmam đơ̆ng choh jang sa sơđơ̆ng ăn kon pơlei”.

Hăm tơdrong mĭnh jơhngơ̆m đon đơ̆ng kon pơlei, hơp tak xăh, anih mơdro sa păng khŭl kơdră, lơ tơdrong jang hơdai pơm tơlĕch tơ̆ Đắk Lắk tŏk bŏk hơtŏk đei yua. ‘Nâu ưh khan lăp jing nơ̆r tơblang ăn ƀai toán sơđơ̆ng tĕch mơdro mă oei jing tơkhoă vă hơtŏk ‘lơ̆ng kơjă tơmam. Trong jang hơdai kơjăp đơ̆ng kon pơlei jang chŭn mir, hơp tak xăh păng anih mơdro sa ưh khan lăp pơm đei tơdrong hơtŏk tơiung ‘lơ̆ng lơ̆m kơjă mă oei jing trong vă pơm tơlĕch choh jang sa yak hloh dôm long nol đơ̆ng anih tĕch mơdro, yak truh 1 tơdrong choh jang sa kơjăp ‘lơ̆ng.