Lơ̆m 2 năr âu ki, tơ̆ lơ tơring kơ dêh char Kon Tum hlôi đei ‘mi păh lăp truh ‘mi tih. Dêh char Kon Tum athei khŭl kơdră chĕp kơ̆l dôm apŭng, pơlei tơm kŭm hăm dôm anih jang ƀơm truh dăr hơlen kơjăp tơdrong tŏ ‘mi kial; pơvei kơtang tơdrong jang răp gak, kơchăng hơlen lăng, dăr lăng, hơmet ming dôm trong jang, trong vă jang tơ jră.

Hơvơn khŭl lĭnh, gre, tơmam tơ jră tơtom, đei yua dôm tơdrong đei ƀôh. Dăr hơlen mă dêh dôm hơnih kon pơlei oei, tơdrong jang tơm, tơtom chă ƀôh hơmơt ưh kơ sơđơ̆ng, kơchăng hơmet ăn khŭl jang, gre, tơmam, khŏm yông kon pơlei lĕch đơ̆ng hơnih krê hơmơt vei sơđơ̆ng tôch ai hơkâu jăn

- Hơnih vei lăng kon pơlei dêh char Gia Lai hlôi chih pơtrŭh hla bơar tơlĕch jang kiơ̆ hloi găh tơdrong akŏm iung tơjră tang găn hơlou hăm ‘mi tih, hơmơt đei đak lŏk jrŏh, đak lip, teh tơdrŭt hơlih lơ̆m dêh char. Dêh char athei tĕnh koăng ăn hloi khul jang dăr lăng hơnơ̆ng rim pơlei pơla oei tơjê̆ đak kroong, hơboong thoong đak, tơring thŭng vă tơtom iung jang yông, chông ba kon pơlei năm oei tơ̆ hơnih sơđơ̆ng. Ăn Khul bơ̆ jang gak vei lăng, hơtơ̆p kơƀang tơbăt tơ̆ dôm gơng lăh, tơring lơ̆p jrŭ, đak jăng. Hơmet ‘lơ̆ng khul jang, gre vă ming hơmet dôm tơdrong răm, pơm sơđơ̆ng trong nơnăm gơ̆h chă yơyak hiôk hian. Tơlĕch jang ‘lơ̆ng rim trong jang vei lăng năng tông choh jang sa; sơđơ̆ng dơ̆ng kơjăp ăn rim hơnih jang kmăi kmŏk pơm tơlĕch tơmam drăm, tơring kơdrơ̆m, pơlei pơla păng rim tơdrong jang sir iŏk mŭk drăm lơ̆m teh tơ̆ rim bro hơmơt đei tơdrong răm. Rim tơ-‘ngla dơnou đak, pơnơ̆t đak, hnam kmăi đak tơlĕch ŭnh hơyuh tơlĕch jang gak kơjăp, lăng hơlen kơjăp ‘mi kial păng đak tơ̆ rim dơnou mong đak; iung jang hloi pơchoh đak ‘lơ̆ng hơ iă, sơđơ̆ng ăn hơnih jang păng sơđơ̆ng ăn tơring pơbăh.