‘Nhŏng Nguyễn Thế Tuấn tơ̆ plt Buôn Ma Thuột, dêh char Đắk Lắk đei hlŏh 10 sơnăm huơ̆r gre chơ tơmoi vih vât đơ̆ng Đắk Lắk năm tơ̆ dôm dêh char Tơring Tŏk bŏk nhen Đà Nẵng, Phú Yên, Khánh Hòa, Bình Định... ‘Nhŏng Tuấn tơroi, đơ̆ng Buôn Ma Thuột năm tơ̆ Phú Yên kơdâu kiơ̆ trong gre 29, sơ̆ jĭ trong yak hrĕnh hlŏh, mă đơ̆ng trong iĕ ră mă lei ưh đei krang kuel kiơ. Oei dang ei, trong đĭ hư bơih, trong yak Đắk Lắk păng Phú Yên đơ̆ng rŏng kơ tơmât hơdai, gô jing tơdrong ưh đei iĕ kiơ.

“Adrol ki, năm đơ̆ng Buôn Ma Thuột - Phú Yên lăp dang 3 jơ 1 puăt đĕch, dang ei kơtĕch 5 jơ ‘mơ̆i gơ̆h truh. Trong hư ‘mĕh kơdâu hrĕnh ưh kơ gơ̆h. ‘Nâu jĭ 1 pôm trong đơ̆ng Buôn Ma Thuột năm tơ̆ Tuy Hoà păng vih hơlơ̆k dơ̆ng. Tơmât hơdai vă jang tŏk mă trong kơnê̆ thoi âu ‘nŏh pơmat tat dêh. Tơdăh ‘mĕh tĕch mơdro hiôk hian, jang tŏk ‘lơ̆ng đơ̆ng rŏng kơ tơmât hơdai ‘nŏh athei pơih xă, pơm hơmet ming trong mă ‘lơ̆ng.”  

Yă Nguyễn Thị Thanh Thu jĭ 1 lơ̆m dang 1.000 ‘nu kăn ƀô̆, bơngai jang oei bơ̆ jang tơ̆ dêh char Phú Yên rŏ năng athei tŏk jang tơ̆ plt Buôn Ma Thuột đơ̆ng rŏng kơ tơmât hơdai. Yă Thu ăn tơbăt, ƀât tŏk tơ̆ Đắk Lắk vang hôp pơma găh trong tơmât hơdai, khul hao gre tôch hiơ̆ yoa trong iĕ, trong kơnê̆, gre yak vih vât lơ athei hơnơ̆ng kơdâu veh kơ gre tih chơ kơtao, gre tih chơ tơmam ming man păng đei hloi gre tang vang đe oh hŏk tro năm hŏk hai: “Đei lơ jăl trong kơnê̆, yak brŏk năm lơ̆m năr hơâm hơăm lơ̆m hơkâu. Truh âu kơnh 2 dêh char mât hơdai, kăn ƀô̆ Phú Yên năm jang tơ̆ Đắk Lắk bơ̆ jang gô tơƀâp pơmat tat yoa trong yak vih vât. 1 giĕng rŏ năng lăp brŏk ngôi tơ̆ hnam 1 vât đĕch, năm 'nŏh pơgê năr mônh păng kơsơ̆ năr 5 'nŏh vih. Mă lei trong thoi âu ưh jor athei năm đơ̆ng kơsơ̆ năr 7 vă truh pơgê năr mônh 'nŏh gơ̆h tom bơ̆ jang.”

Trong gre 29 jĭ 1 lơ̆m dôm trong gre gĭt kăl tơƀưh tơring Tơter đak dơsĭ găh Pơbăh tơring Tŏk bŏk păng Tây Nguyên; năm truh tơ̆ tơring sơlam Đắk Lắk – Campuchia kơjung dang 293km. Mă lei, hăm tơdrong hơgăt kơ trong gre kâp IV tơring groi kông, đei 2 trong vih vât, trong xă 5,4m păng 7,5m, trong đei tuh yâu hăk pơm đơ̆ng lơ sơnăm bơih, Trong gre 29 đĭ pă đei druh kiơ̆ tom hăm tơdrong jang tŏk bơih.

Ƀok Trương Công Thái, Phŏ Kơdră vei lăng kon pơlei dêh char Đắk Lắk, ăn tơbăt, tơdrong oei tơlĕch vă tơmât jên pơm hơmet trong đơ̆ng jăl Km31+300 (trong gre teh đak kơsô̆ 1, thĭ xăh Đông Hòa, dêh char Phú Yên) truh ƀât anih tơƀưh Trong gre kơsô̆ 14 (Km178+062, thĭ xăh Buôn Hồ, dêh char Đắk Lắk), kơjung truh 147km. Trong âu vă pơm hơmet jing trong kâp III, gre gơ̆h kơdâu hrĕnh đơ̆ng 60-80km/jơ, đei 4 tŏ trong, trong xă 20,5m, jên tơmât jang hlŏh 10.000 ti.

“Ƀât măt dang ei ‘nŏh athei pơm hơmet ming trong vă pơyoa ăn tơdrong yak vih vât mưh đe kăn ƀô̆ athei năm bơ̆ jang iŏk đơ̆ng ‘năr 1/9 truh âu kơnh. 2 dêh char Phú Yên, Đắk Lắk hlôi đei hla ar gơih ăn Anih tơm vei lăng ming man, Anih tơm vei lăng jên hu tơchĕng hơlen tơlĕch jên tơgŭm ăn tơring pơm hơmet pơ ‘lơ̆ng trong gre ‘nâu lơ̆m khei ‘năr hrôih hlŏh.”

Ƀok Tạ Anh Tuấn – Kơdră vei lăng kon pơlei dêh char Phú Yên akhan, mưh trong gre 29 đei pơm hơmet ming gô pơjing tơdrong hiôk hian ăn rim bơngai, gre yak vih vât, tĕch mơdro tơmam, vang tơgop jang tŏk mŭk drăm, tơpôl đơ̆ng rŏng kơ tơmât hơdai. Mă lei, găh đunh đai ning mônh kơnh, dêh char Đắk Lắk ‘nao athei pơm trong gre kơdâu hrĕnh klĕch trong Đông – Tây năm tơ̆ đak dơsĭ, jang tŏk kiơ̆ trong Trung ương tơlĕch. Tơdrong ‘nâu kŭm đei Khul kơdră chĕp Đảng 2 dêh char drơ̆ng nơ̆r păng rŏ năng gô tơlĕch jang kiơ̆ trong jang hơdoi đơ̆ng teh đak hăm kon pơlei (PPP) iŏk đơ̆ng 2025 – 2030 tơplih ăn tơdrong hơgăt đơ̆ng Khul kơdră teh đak vă jang đơ̆ng rŏng kơ sơnăm 2030.

Ƀok Tạ Anh Tuấn pơma: “Hăm tơdrong ‘mĕh vă hrei ‘nâu yoa đơ̆ng tơmât hơdai 2 dêh char, kŭm nhen tơlĕch trong jang tŏk năm tơ̆ đak dơsĭ, ‘nŏh tơdrong pơm trong gre kơdâu hrĕnh ‘nŏh tôch gĭt kăl. 2 dêh char Phú Yên păng Đắk Lắk dăh mă đơ̆ng rŏng kơnh jĭ dêh char Đắk Lắk ‘nao gô tơroi ăn Khul kơdră teh đak, Quốc hội hơtŏk hrĕnh tơdrong jang ming man đơ̆ng 2025 – 2030.”

Pơm hơmet pơ ‘lơ̆ng trong gre 29 păng man trong gre kơdâu hrĕnh tơƀưh “bri kông hăm đak dơsĭ” pơjing trong yak tơm gĭt kăl ăn dêh char Đắk Lắk ‘nao, ưh lăp athei jăh jang dang ei hloi đĕch, mă oei pơjing jơhngâm pran ăn tơdrong jang tŏk đơ̆ng rŏng kơ tơmât hơdai dơ̆ng. Trong yak xă, ‘lơ̆ng rŏ gô pơih đei tơdrong ‘lơ̆ng vă tơguăt tơring, tưk tơiung tơdrong jang tŏk mŭk drăm, tơpôl tŏk pran kơjăp hlŏh dơ̆ng ăn dêh char Đắk Lắk ‘nao đơ̆ng rŏng kơ tơmât hơdai kŭm nhen ăn jơ̆p Tơring găh Pơbăh kơ Tơring Tŏk bŏk-Tây Nguyên.