Hăm tơdrong kăl “Tơgoăt pôm ƀơ̆r đon - Kon pơlei pơm tơm - Pơm kiơ̆ tơpăt - Jang tơnăp - Đei yua”, Hop akŏm băt hơdăh hơtŏk ‘lơ̆ng tơdrong chĕp kơ̆l, pơtrŭt tơplih kơsô̆, jang ‘lơ̆ng tơdrong jang pơjing khôi luơ̆t, dăr lăng păng hơpơi ‘meh đơ̆ng kon pơlei. Pơma tơ̆ Hop akŏm, Phŏ Kơdră Quốc hội lăng ‘lơ̆ng Hla ar chih roi tơbăt chĭnh trĭ, akhan Đảng bộ hlôi lăng ƀôh ƀlep dôm jơnei, tam mă ‘lơ̆ng păng tơlĕch ăn trong jang trŏ lăp.

Phŏ Kơdră Quốc hội athei akŏm vei kơjăp dôm tơdrong tơchơ̆t, athei, pơtôch đơ̆ng Trung ương, Anih tơm Chĭnh trĭ, mă loi ‘noh jĭ dôm tơdrong găh proh hơmet bơngai jang, hơmet ming trong jang, pơjing khôi luơ̆t. tơplih ‘nao tơdrong jang tŏk. Pơma hơdăh hơnăp jang mŭk drăm kơdih, khoa hŏk kơmăy kơmŏk păng tơplih kơsô̆ ‘noh jĭ tơdrong ‘lơ̆ng gĭt kăl, tơgop hơnhăk teh đak yak mơ̆t lơ̆m chăl hơtŏk tơiung ‘nao, jrŭ să păng kơjăp.