Pơgê 11/6,  Quốc hội jăl XV pơtơm yak mơ̆t lơ̆m ‘măng 2 ‘Măng hop akŏm mă 9, păng tơchĕng hơdrol pơgơ̆r đơ̆ng dang ei truh đĭ ‘năr 27/6.  Tơ̆ jơ bơ̆jang pơgê 11/6, Quốc hội mơ̆ng hla ar tơroi dăr hơlen păng pơma dơnuh tơ̆ grŭp găh 1,2 hla ar chih ming tơdrong tơchơ̆t, luơ̆t, lơ̆m noh đei Tơdrong jang proh hơmet anih bơ̆jang tơ̆ dêh char sơnăm 2025. Kiơ̆ Tơdrong jang, Khŭl kơdră teh đak tơlĕch 23 trong jang proh hơmet hăm 52 dêh char, pơlei tơm, pơjing 23 dêh char, pơlei tơm ‘nao, vei đêl so 11 anih jang, hơnhăk akŏm đĭ đăng kơsô̆ lơ̆m teh đak oei pă 34 dêh char, pơlei tơm.

Akŏm đĭ đăng ƀiên chê̆ dôm anih jang tơ̆ dêh char proh hơmet ‘noh hloh 447.000 ‘nu. Dôm bơngai tang măt drơ̆ng lăp hăm dôm trong jang, hơlen lăng tơdrong pơjing Tơdrong jang kiơ̆ ƀlep nơ̆r athei đơ̆ng Trung ương, lăp hăm tơdrong tơchơ̆t 60/2025 đơ̆ng Hop akŏm Trung ương 11, jăl XIII.