"Kăn ƀô̆ năm B" ‘nŏh jĭ nơ̆r đei yoa vă pơma truh đe kăn ƀô̆ đơ̆ng tơring găh Tu hăm jơhngâm đon apinh đơ̆ng kơdih, yak klĕch groi kông Trường Sơn mât tơ̆ tơring Pơbăh vang tơblăh đơ̆ng 1965 – 1975. Tơ̆ jơ pơm lêh tơ̆ Gia Lai, hăm ƀĕnh jơhngâm đon hưch hanh, 11 ‘nu kăn ƀô̆ năm B păng kơtum kơtŏng ‘nhŏng oh kơ 22 kăn ƀô̆ nai hlôi iŏk dơ̆ng dôm Hla ar hô sơ đei vei lăng tôch ‘lơ̆ng lơ̆m hlŏh 50 sơnăm âu ki.

Dôm tơmam ‘nŏh đei: ƀăng hŏk, kơthơ chih hăm ty, mê đai, kơphĭu ‘mơ ‘met mă ưh ‘nŏh hla ar kăn kươk… jĭ tơmam mă đe kăn ƀô̆, bơngai đei hŏk đơ̆ng tơring găh Tu gơih ăn tơ̆ Ban Thống nhất Trung ương, mưh apinh năm tơ̆ tơring Pơbăh yoa tơdrong jang kăch mang. ‘Nâu jĭ dôm tơmam tơƀôh hơdăh jơhngâm đon tơpăt ‘lơ̆ng, đon lui kơjăp hăm tơdrong tơblăh iŏk rơngei hơdrĕch hơdrung đơ̆ng 1 jơhnơr “năm tơblăh” yoa Teh đak. 

Ƀok Phạm Văn Nguyên (82 sơnăm), 1 ‘nu thây pơtho đei athei năm tơ̆ tơring Pơbăh sơnăm 1972, tôch hơiă mưh chĕp lơ̆m ti dôm tơmam kơdih ƀât oei tơdăm sơ̆: “Kŭm hăm inh, sơnăm ‘nŏh đei 5 ‘nu ‘nhŏng oh vang năm hơdai lơ̆m 1 năr. Dang ei iŏk dơ̆ng hla ar hô sơ, inh tôch hơiă. Bôl boăl năm hơdai hăm inh ƀât dŏh sơ̆, đei bơngai đĭ lôch bơih, ưh băt hăm pă gơ̆h iŏk đei kiơ ưh. Hô sơ ‘nâu jĭ tơmam mă inh ưh đei lai yơ hiơt. Inh đĭ oei tơ̆ Gia Lai 53 sơnăm bơih, dang ei năm tơ̆ âu ‘nŏh jĭ tơdrong tôch čhôk ‘nă đơ̆ng inh”.

Đơ̆ng rŏng kơ lêh pơjao hla ar hô sơ, dêh char Gia Lai pơgơ̆r pơdă “Yak tŏk đơ̆ng groi teh Bazan”. Pơgơ̆r truh đĭ ‘năr 30/4 âu kơnh, pơdă ming tơƀôh lơ tơmam lơ̆m khei ‘năr iung tơblăh păng bơ̆ jang tơiung pơjing ming đơ̆ng khul linh hăm kon pơlei Gia Lai đơ̆ng rŏng Tơdrong Tơchơ̆t Giơ-ne-vơ sơnăm 1954 truh dang ei. ‘Măng pơdă pơm 2 jăl ‘nŏh “Năm hlôi ‘nhui ƀrâm đơ̆ng tơblăh”  păng “Tŏk iung tŏk bŏk bri kông”. Kiơ̆ đơ̆ng noh tơƀôh dơ̆ng kơhrĕng blăh hla ar, um rup kăp gĭt găh khei ‘năr tơblăh iŏk rơngei Gia Lai (17/3/1975) păng tơblăh iŏk rơngei tơring Pơbăh (30/4/1975), kŭm nhen dôm tơdrong adrin jang tơiung ming păng jang tŏk đơ̆ng dêh char Gia Lai, đơ̆ng 1 dêh char groi kông pơmat tat jing tơring jang tŏk pran.  

Ƀok Đỗ Xuân Quý, 1 ‘nu kơtum kơtŏng kăn ƀô̆ năm B, kŭm hăm 4 jơhnơr lơ̆m unh hnam vang truh hăm ‘măng pơdă tôch hơiă lơ̆m jơhngâm: "Inh tôch čhôk ‘nă. Inh chông ba unh hnam, kon sâu năm tơ̆ âu vă băt hơdăh tơdrong juăt ‘lơ̆ng đơ̆ng chăl yă ƀok sơ̆ thoi yơ, vă hơnơ̆ng yak kiơ̆, khŏm vei lăng teh đak Việt Nam roi đunh roi pơdrŏng, pran kơjăp ling lang”.

Lêh pơjao hla ar hô sơ ăn kăn ƀô̆ năm B păng Pơdă tơmam “Yak tŏk đơ̆ng groi teh Bazan”, đei pơgơ̆r ƀlep ƀât jơnăr teh đak oei năm truh ‘măng tơbăt 50 sơnăm năr pơjing đei 1 teh đak kơjăp ‘lơ̆ng, vang tơgop pôk pơ ư chăl arih kơtang nuih mơng adrol sơ̆ vă mât hơdai hăm tơdrong arih xa chăl ‘nao ‘lơ̆ng rŏ hrei ‘nâu. Tơdrong ‘nâu nhen 1 nơ̆r tơtă ăn jơhnơr mơlôh hrei ‘nâu athei arih mă tơgăl hăm chăl adrol sơ̆, păng đei đon tơnăp vang tơiung pơjing teh đak ning mônh kơnh./.