Lơ̆m 'năr tŏ 'lơ̆ng kơ pơyan phang Tây Nguyên, hăm jơva ang kơ tơdra hơsuang Lăm Vông, jơva hơgơ̆r, nơ̆r chĭng chêng păr ang, kon pơlei Lào tơ̆ ou sô̆ hơ-iă akŏm lêh tih hloh lơ̆m sơnăm. Têt Bunpimay, dah mă Têt săi đak jĭ têt pơtơm kơ sơnăm 'nao kiơ̆ Phơ̆t lĭch păng adoi jĭ 'măng vă ôp rơgoh dôm tơdrong ưh kơ pŭn ai, hơpơi đei tơdrong sơđơ̆ng sơnêp sơnua.

Ƀok Lê Văn Nuôi, Phŏ Kơdră Anih jang vei lăng kon pơlei apŭng Buôn Đôn ăn tơbăt, sơnăm ou, Têt Bunpimay tơ̆ Buôn Đôn oei jĭ tơdrong akŏm tơbăt 30 sơnăm tơ-iung pơjing apŭng Buôn Đôn, 50 sơnăm năr tơblah jơnei tơring pơbah, rơngei teh đak, sơng kơ kuh kơ anglŏ sơnăm hơtŏk tơ-iung 'nao hăm tơdrong pơgơ̆r kiơ̆ pơkăp 2 jăl: “Sơnăm ou tơbăt dôm năr kăp gĭt kơ sơnăm, kơlih sơnăm ou jĭ sơnăm mă hơtuch luch sut lê̆ jơnŭm pơgơ̆r tơ̆ apŭng, kơyuơ 'noh 'meh răk 'măn vă jơnŭm pơgơ̆r xah đe gô vei răk tơƀăk mong tơdrong juăt jue ou. Sơnăm ou adoi pơgơ̆r lơ tơdrong jang nai, pơtih nhen tơroi gah achon Hoàng sa, Trường Sa jĭ kơ Việt Nam, mă 2 dơ̆ng 'noh đei khul joh ayŏ kơdŏ suang kơ apŭng Lăk vă akŏm joh ayŏ đơ̆ng bơngai M’Nông hăm bơngai Lào.”

Atŭm hăm tơpôl kon pơlei Lào, lơ kon pơlei kon kông nai tŏk bŏk oei hơrih pơm jang tơ̆ Buôn Đôn adoi truh akŏm sô̆ chơt ƀơ̆t têt Bunpimay. Pơmai Vy Thị Mới, bơngai Nùng, tơ̆ xah Ea Bar tơroi gah tơdrong chơt hơ-iă kơ po đei năm akŏm dôm khôi juăt nhen chô̆ brai ti, tơhum ƀok Phơ̆t păng săi đak: “ 'Măng blŭng inh đei năm akŏm Têt Lào sô̆ hơ-iă tơpă, cham char penh teh sô̆ sôn, đe chô̆ brai ah ti inh pơtih ăn tơdrong pŭn ai păng hơ-'nhăk ăn tơdrong 'lơ̆ng rŏ lơ̆m tơdrong hơrih”

Chô̆ brai ah ti, kiơ̆ khôi juăt kơ bơngai Lào, jĭ khôi kăp gĭt lơ̆m năr Têt, đơ̆ng rŏng kơ ƀok soi phơ̆t dah mă bơngai 'lŏ sơnăm gô chô̆ minh djoi brai kok ah kŏng ti bơngai nai păng krao apinh jơnap ăn đe sư. Dôm khôi tơhum ƀok Phơ̆t, hơtŏk chuơh dah mă săi đak adoi akŏm ƀenh kơ tơdrong kăp gĭt gah đon bơnôh kon bơngai. Tơblang gah tơdrong kăp gĭt kơ dôm khôi juăt ou, 'nhŏng Y Nô Ly Kbur, bơngai Lào hơrih tơ̆ xah Krông Na ăn tơbăt: “Ah mă bơ̆n chô̆ brai tơ̆ ti, đe ƀok soi phơ̆t gô krao apinh ăn kơ bơ̆n gơh đei pŭn ai hloh, oei hơtŏk chuơh noh jĭ tơdrong tơguăt tơguăl tôm kon pơlei, oei săi đak noh vă bơ̆n sut hŭt lê̆ dôm tơdrong hĕl sơ-'ngon, tơdrong ưh kơ 'lơ̆ng lơ̆m tơdrong hơrih, apinh ăn kơ bơ̆n đei tơdrong hơrih pŭn ai păng jơnap hloh”

Têt Bunpimay tơ̆ Buôn Đôn roi sô̆ hơ-iă hloh kơlih nơ̆r hiĕk atŭm hăm tơdra hơri hơsuang Lăm Vông juăt jue. Pơmai H’Ưng ÊBan, oei tơ̆ pơlei Yang Lành, xah Krông Na, apŭng Buôn Đôn ƀrơ̆k kơ jơhngơ̆m:  “Inh năm akŏm Têt Lào đei 4 sơnăm kơ ou bơih, sơnăm ou apŭng pơgơ̆r tih hloh păng đei lơ kon pơlei truh akŏm. Inh ƀôh tơdrong akŏm Têt Lào ou kăp gĭt tơpă, tơguăt kon bơngai, tơguăt dôm hơdrung hơdrĕch hăm dih băl. Inh ƀôh sô̆ hơ-iă, nhen dang ei tơdra Lăm vông đei reh ang păng kơdih adoi 'meh chă hơtŭn hơsuang hloi”

Ưh hơdrô̆ jĭ anih akŏm joh ayŏ, Têt Bunpimay oei tơƀlŏk dôm tơdrong kăp gĭt gah tơbôl juăt jue kơ kon pơlei Việt – Lào. Hăm ƀok Đinh Công Trình, linh so hlôi năm tơblah tơ̆ teh đak Lào đơ̆ng sơnăm 1969 truh sơnăm 1973, noh ou jĭ 'măng pôk bơnê kăp gĭt: “Hơdrol ki gah to đei tơdrong tơgŭm đơ̆ng kon pơlei Lào đơ̆ng găr ƀoh, đak, truh tơ̆ jĭ pơlŏ trŏ tơngiĕt đei kon pơlei vei lăng. 'Năr ou truh tơ̆ ou đei akŏm khôi juăt ou noh sô̆ hơ-iă tơpă, đei ƀlŏk hơdơ̆r kơ tơdrong tơgŭm đơ̆ng kon pơlei Lào păng adoi hơpơi 'meh Đảng teh đak 2 pah tơrĕk pơjing tơdrong tơbôl Việt Nam – Lào hơnơ̆ng 'lơ̆ng kơjăp ling lang”

Têt Bunpimay, khôi juăt kơ bơngai Lào tơ̆ Buôn Đôn – ưh hơdrô̆ jing năr akŏm kơ minh jơnŭm tơpôl, mă oei jing um pơtih 'lơ̆ng hơ-iă kơ tơdrong tơguăt tơguăl, tơdrong tơroh gah joh ayŏ đơ̆ng dôm hơdrung bơngai kon kông hơrih hơtŭm lơ̆m tơring teh sơlam grasia kơ dêh char Đăk Lăk.