Labaih 1 bilan blaoh, puac adit halei jeng yau nan, di Pasak Jitvu Taong abih xa Hàm Thuận, tinh Lam Dong, kapul urang adaoh tamia bhap bini saong parang iek angui cuk khan ao bangsa Cam hu mbaok tame Harei raya jeng chreih chrai pasram.

Sa-ai Thông Đinh Đương, labaok ka kapul urang adaoh tamia bhap bini brei thau, ini lac mbang akaok meti sa-ai hu mbaok tame Harei raya, than sa-ai mboh biak hadah mbaok meta saong chreih chrai, nan kham merat gam haong dom urang dalam kapul pasram, kham merat.

“Ini oh lac sa Harei raya praong blaoh daok lac labik piah dom adei meda jum tangin rik daong ha sit prein yava di drei piah yaih khan ilamo bangsa Cam ka taong abih bhap bini rahra bhap bini ieik thau. Biak thau dhar phol Ndang saong Karja hu brei kein lagaih ka urang bangsa Cam di taong abih labik dalam negar meda hu pataom mai, jhul tagok hatai thau ka ilamo di dam dara dalam harei hadei, dalam bruk khik ramik, patagok ilamo bangsa Cam. Adei jeng yau taong abih urang dalam kapul urang adaoh tamia urak ini daok biak kham merat, caong khin ba mai dom kadha biak gheih abih piah duh ka mikva.” 

Tui kadha ba mai tal harei raya lac “Khik ramik, patagok ilamo bangsa Cam tinh Lam Dong dalam jaman bahrau”, kapulan Lam Dong brei hu mbaok tame rilo asal kadha biak gheih piah yaih khan ilamo bangsa Cam daok hu bhap bini khik ramik dalam tinh. Dalam nan, bruk ngak ilamo pataom tame dom asal kadha, yau ye: parang iek, yaih khan banah adat cambat di ilamo bhap bini Cam; parang iek yaih khan ilamo bhap bini bangsa Cam dalam bruk padang saong pacang khik palei negar. Gam haong nan, hu bruk parang iek, yaih khan bruk ngak meng tangin bhap bini yau jhik menyim jih dalah bingula, bruk ngak lan am bangsa Cam; raya adaoh tamia bhap bini saong parang iek khan ao angui cuk bhap bini bangsa Cam.

Nghe nhan Uu tu Lâm Tấn Bình daok di xa Bắc Bình, brei thau, tuk hu tinh palih ruah ngak lambaok ka banah pakacah ka bruk ilamo, ong gam haong dom urang dalam kapul hu tagok kadha saong tukvak pasram. Ong Lâm Tấn Bình brei thau, kapul brei parang iek, yaih khan banah di adat “Patagok bruk ngak Gru di halau janeing Kadhar di agama Ahier di bangsa Cam Lam Dong”. Ini lac kadha bahrau, hu padang tani tanat saong pagun sanya ngak jeng bruk naih gheih ka tinh Lam Dong di Harei raya.

“Adat patagok bruk ka ong Kadhar….”

Langiu di banah pakacah ka ilamo bhap bini, adaoh tamia, pahat padhih, Kapul Lam Dong daok hu mbaok tame labik parang yaih khan ilamo bhap bini bhum palei, ngak naih gheih thaik thaot urang bangsa Cam di Lam Dong dalam bruk padang saong pacang khik palei negar; inem mek, labik gheih ghang, dom raya adat; yaih khan ka paok pataom drap ar ilamo Medhir Patao Cam… Abih di nyu nan lac, kapul hu mbaok yaih khan dom labik jirah rivang danei angan di Lam Dong, yaih khan dom kaya ngak nong, kaya ndap nda OCOP naih gheih;…

Ong Nguyễn Tú Long, Phaok Yam ndok pasak Ilamo saong Pasang iek Being taneh riya Dak Nong – tinh Lam Dong brei thau, Kapul Lam Dong hu 85 urang hu mbaok tame Harei raya gam haong hatai pambuak gauk, bac tangi saong gam haong gauk patagok:

“Urak ini bruk srap gap anak meta hu tani tanat. Daok banah raya adat saong adaoh tamia bhap bini jeng yau parang iek khan ao angui cuk bhap bini bangsa urak ini daok pasram. Lac danak dak ndung bak ilamo bangsa Cam. Thun ini, kapul pasak lac di xa Hàm Thuận dalam nan hu: caoh balaong, dom kadha padhih karei, blaoh kapul urang parang iek hu mbaok adaoh tamia bhap bini saong parang iek khan ao ngui cuk. Daok banah pẩng iek raya adat ye hu ngak meng halau janeing aguma di xa Bac Binh.”

Gam haong Khanh Hoa, Lam Dong ieu lac sa tinh hu rilo urang bangsa Cam rilo abih dalam negar. Tukvak tapa, bruk khik ramik, patagok dom ilamo siam gheih di dom bangsa tuk halei jeng hu bhum palei sangka iek praong.

Tui hatai pambuak, bac magru, paglaong ilamo, bruk ngak di bhap bini dalam bruk khik ramik, patagok dom yaom kaom ilamo bhap bini di bangsa Cam dalam jaman ba drei tame saong patagok di taneh ia, labaih 80 urang pahat padhih, urang parang iek saong dom urang nghe nhan ramagei bangsa Cam tinh Lam Dong daok kham merat pasram biak chreih chrai, caong maong tal Harei raya biak rilo sambo bar ilamo di bangsa drei./.